《開心速遞》「英進」招浩明放棄金融界發展 為理想入無綫做演員

招浩明

無綫處境劇《愛‧回家之開心速遞》長做長有,唔少劇中演員都被發現周身刀,連「尋寶圖」入面嘅「英進」招浩明原來都係大有來頭。招浩明本身屋企住九龍塘,入讀傳統名校,中二後移居美國,係加州州立大學主修商業及財務管理學系,畢業後做過多間銀行,都算係金融才俊。佢仲有另一個身份,係一個世界級魔術師,8歲已經奪得魔術城堡近景魔術奧林匹克大賽金盃獎,亦係比賽史上最年輕得獎者之一。不過英進自14歲開始已經好想做演員,為咗做演員甘願放棄喺美國金融界發展,返嚟香港加入無綫。

好多人都話佢「離地」,但好彩屋企人支持佢嘅決定,仲話如果做一份唔係好鍾意嘅工,大部分時間都係做唔係咁鍾意嘅工作,咁不如唔好嘥時間,揀一份鍾意嘅工,雖然金錢上冇咁穩定,不過可以發展喺有熱誠嘅工作,成功機會一定會比較大。

招浩明都唔係一返香港就順利加入無綫,佢報唔到《香港先生》及《超級巨聲》。之後就《超級巨聲2》及《魔法擂台》都擦身而過,之後佢就參加無綫第26期訓練班,喺2015年正式加入無綫,憑「英進」一角開始被人認識。

佢仲喺今年成功考獲健身牌,可以副業教吓健身,另外仲可以表演魔術幫補一下。

招浩明與《開心速遞》演員
招浩明與《開心速遞》演員