鍾采羲掟百萬創業 黃婉曼力保員工飯碗

東方日報
鍾采羲認為女人任何情況下都要扮靚,所以決定賺女人錢。

新冠肺炎來勢洶洶,「爆E超蓮」鍾采羲無懼「疫」境,投資百萬開生活美容概念店,明賺女人錢!至於前天氣女郎黃婉曼,為保員工生計,諗盡方法救餐廳。

2020年對藝人鍾采羲(Iris)來說,是非常特別的一年,入行10周年兼踏入「29+1」,加上剛與前公司約滿,回復自由身的她坦言心態有變:「我演技唔係好好,要為下半生着想。(結婚淡出幕前?)等我拍多兩部戲先。」她揚言有戲會拍,但更有興趣搞生意,最近與好友Janet以及另外5位女仔夾份在銅鑼灣開設生活美容概念店,將美加的扮靚概念引入本港,主打訂製唇膏體驗,親手DIY唇膏。早前她與Janet在店內試機,打造自己喜愛香味及質感的唇膏。

有信心賺女人錢

出身富貴的Iris原來是首度創業,處女投資了過百萬,雖然一月開幕時撞正疫情爆發,她卻完全冇有怕:「我覺得病毒會過去,總會天朗氣清,疫市創業都無畏無懼,覺得一樣會做得好。」她對做女人生意信心十足:「女人任何時候都需要扮靚,我有個朋友準備生BB,我見佢化咗個勁靚妝、黐晒眼睫毛先入產房,扮靚冇分年齡、時間同季節。」而Janet則從經濟角度分析「唇膏效應」,指美國經濟不景氣時,唇膏銷量反而更高:「因為可以氹女仔開心。」

考慮設戶外座位

至於黃婉曼位於將軍澳的麵包烘培餐廳,生意受疫情影響,上月諗過暫停營業,但考慮到員工有家庭負擔,故堅持撐住日日開。她以多招抗疫法自救,包括噴消毒噴霧、提供酒精搓手液及小朋友口罩,並已暫停麵包烘焙班,又將餐廳枱距拉闊,她說:「我哋呢度開揚啲,仲有競爭力,有人問可唔可以將座位搬出外面坐,我覺得可以考慮,等天氣好啲就諗諗。」

黃婉曼不時落舖打點及消毒,望顧客食得安心。
黃婉曼