錢嘉樂失初吻胸襲蝦頭

東方日報
嘉樂使出「揸波龍爪手」,與蝦頭各自Chok甫,十分搞笑。

錢嘉樂和蝦頭合作綵排舞台劇,兩人預告會輪流在劇中「犧牲色相」,先是嘉樂被蝦頭奪去舞台初吻,而蝦頭亦會被嘉樂「胸襲」,蝦頭更獻出了「第一次」給對方!

藝人錢嘉樂、蝦頭(楊詩敏)及監製潘嘉德日前為舞台劇《今晚打老虎》綵排,嘉樂影相時搞笑作狀擺出「揸波龍爪手」的甫士。兩人排了一日進展順利,講到劇中嘉樂被蝦頭搶去舞台初吻,蝦頭笑言都會有樣東西獻給嘉樂,但兩人秘而不宣,嘉樂懶神秘說:「咁大範圍都唔中?」監製忍不住踢爆:「你睇吓頭先嘉樂隻手點樣就知。」嘉樂解釋:「條路就係咁o架啦,但會點樣呢?呢個係開心劇,係樂而不淫嘅。」蝦頭亦說:「唔係你哋諗咁咩嘅。」

「第一次獻咗畀佢」

問到劇中有錫戲等親密接觸可會尷尬?嘉樂說:「冇嘅,同佢做好舒服,佢非常專業。」問到排戲時可忍不住爆笑?蝦頭笑說:「我每次同佢排完戲,我牙骹都好痛,我同佢排兩句就會笑到踎低,捱唔到呀!(到時正式演出怕唔怕都係咁?)其實佢冇事嘅,係我渣啲,佢實在太有幽默感。」講到劇中要紮胸演出,她表示排練時不用紮,但笑說:「如果綵排紮住到時細咗都幾好。(你好大犧牲?)唔緊要啦,好快會大番,呢啲時大時細。」

蝦頭又開心謂劇中可以與嘉樂和袁偉豪合作:「有兩大型男伴住做舞台劇,真係唔多機會!(有冇乘機摸佢哋?)我哋有好多肢體接觸。」嘉樂笑言不覺蝕底:「我哋為舞台去到好盡。」蝦頭又透露排練時有一幕很驚喜:「我企喺度準備懸樑自盡,之後嘉樂一手抱起我,我覺得好Man呀!冇男人咁樣一手抱起過我,第一次就獻咗畀佢。」嘉樂說:「佢本身仲諗住使唔使企喺張櫈度,即係懷疑我唔夠力,所以我就要表達出嚟,之後所有嘅排練就順利好多。」

蝦頭與嘉樂親密接觸冇尷尬!
監製潘嘉德忍不住踢爆兩人的秘密。