金馬獎金雞獎同日頒獎 內地網友撐對岸「平凡而自由」

華語電影盛事第56屆台灣金馬獎,喺剛過去嘅星期六舉行。由於上屆頒獎禮上台灣紀錄片《我們的青春,在台灣》的傅榆,獲獎致詞時提及「希望我們的國家可以被當成一個真正獨立的個體來看待」,搞到內地電影人拉隊唔去慶功之餘,內地電影當局直情決定今屆金馬獎唔玩不特止,仲要同日舉行中國電影金雞獎,擺明對撼!

金馬獎今屆入圍名單冇晒內地電影,台灣同香港片自然成為主角。頒獎禮冇咗一眾來自內地嘅華語影壇巨星,成個頒獎禮少咗星味,但係得到唔少人讚賞。內地文青聚集地「豆瓣」網,網友對金馬獎嘅評價普遍正面,包括話「平凡而自由,這就是金馬遙遙領先的現狀」、「金馬獎是華語電影最獨特的存在,無法取代」等等。

至於同樣喺「豆瓣」網,網友對金雞獎頒獎禮嘅評價就正反不一嘞。

喺金馬頒獎禮完結後,有能操流行國語但以蹩腳英文發言的「外地」記者,問執委會主席李安「中國封殺有損失嗎?」,被金馬執行長聞天祥直斥「我覺得你的問題很過份」,而李安亦好大方回應「損失當然損失,包括星光、參展作品,但是我覺得今年參展作品,不會比每一年差,這些是可以評論的。數量當然比過往單薄,我們也不諱言。」

至於獎項方面,台片《陽光普照》奪得金馬獎最佳電影、最佳導演、最佳男主角等5項大獎。由電玩改編的《返校》亦得到5個獎,包括最佳新導演。而喺金雞獎,全國狂收46億嘅《流浪地球》贏得最佳電影,而香港導演林超賢就以《紅海行動》奪得最佳導演。

到底邊個頒獎禮好睇又有氣勢,賽果合唔合理,你地睇完評價吓仲好啦!