金庸作品《鹿鼎記》彭浩翔執導拍成三部曲

彭浩翔導演日前喺面書公佈開拍首部古裝電影,就係改編金庸嘅《鹿鼎記》,而且會將故事拍成三部曲!根據外媒《Variety》報導,今次製作費每集約8000萬美金,3部曲合共2億4千萬美元(接近19億港紙!),絕對大製作!

彭導一向擅長捕捉都市男女百態,《志明與春嬌》、《低俗喜劇》或最近期嘅《恭喜八婆》都充滿大量貼地對白(日常對話點可以無粗口),市井得嚟又有小聰明,呢啲同樣係韋小寶嘅人物設定。自細喺妓院長大嘅韋小寶,雖然無讀過咩書武功又麻麻,但憑住街頭智慧、精通人情世故同轉數快而多次化險為夷,成功上位,最厲害係靠口花花娶咗7個老婆!

《鹿》故事家傳戶曉,多次改編成電視劇,由梁朝偉、張衛健、陳小春到黃曉明都做過韋小寶。電影方面有1983年邵氏出品、汪禹主演嘅版本,最出名同最經典當然係由1992年周星馳主演、王晶導演嘅《鹿鼎記》同《鹿鼎記II神龍教》,連金庸都親筆大讚周星馳嘅韋小寶「不做第二人想」。

改編消息一出,大家最關心邊個做小寶同佢啲靚老婆。新版選角都幾高難度吓,話哂三部曲,萬一cast咗個無觀眾緣嘅小寶都幾大鑊!彭導暫時透露會有周迅參演,至於會唔會見到志明(余文樂)、暴龍哥(鄭中基)或者Brenda同Dada就真係要等下先知啦,不過觀乎個大額製作費,《鹿》應該會面向整個華語市場,分分鐘中港台日韓演員都有齊!不過可唔可以搵返徐錦江做鰲拜?

其實韋小寶係個著古裝幫皇帝打工嘅小市民,唔知彭導個版本會唔會有小寶喺皇宮後巷,同班太監一齊食煙、瘋狂講粗口、打牙骹喪講皇上是非呢?