重頭劇《法證先鋒IV》首播 網民:情陷夜中環+多功能老婆配搭

《法證先鋒IV》劇照

無綫重頭劇《法證先鋒IV》係金牌監製梅小青嘅告別之作,劇集以科學鑑證為題材,主要講述「滅罪鐵三角」高Sir(黃浩然飾)、Dr. Man(李施嬅飾)及King Sir(譚俊彥飾)攜手合作,透過法證科學及執法精神去披露罪惡真相,將兇徒繩之於法。劇集喺噚晚首播,等我哋一齊睇下網民有咩反應啦。

朱晨麗廣東話有待改善

近年一劇接一劇嘅朱晨麗(朱朱),今次喺劇中飾演重案組警長高靖,外表硬朗,性格外冷內熱。佢喺首集已經有唔少戲份,不過唔少網民都話朱朱嘅廣東話有待改善、冇字幕嘅話唔知佢講咩、同埋好難想像佢係madam等等。

首集故事刺激感欠奉

以科學鑑證為題材嘅《法證先鋒IV》,噚晚就講到電視台喺錄影途中,劇團丑生靚少寶突然吐血倒地,及發現劇團總監龍耀中被殺,而佢嘅死狀仲模擬粵劇傳統儀式「祭白虎」。之後,高Sir(黃浩然飾)、Dr. Man(李施嬅飾)同埋King Sir(譚俊彥飾)等人就展開調查,不過暫時未知邊個係兇手。網民們睇完之後都話第一集好悶、完全冇緊張嘅感覺及劇情太過平鋪直敘等等。

重量級陣容助陣

劇集除咗搵咗全新班底黃浩然、李施嬅、譚俊彦、陳煒、朱晨麗及湯洛雯等人主演之外,仲有唔少重量級嘅老戲骨客串助陣,喺首集已經有米雪同四哥謝賢,之後仲會有謝雪心、鮑起靜及羅蘭等演員演出。難怪網民話非常吸引啦!

《情陷夜中環》 + 《多功能老婆》配搭

第一集出街後,唔少網民都有留意到劇集中有《情陷夜中環》同埋《多功能老婆》嘅演員配搭。《情陷夜中環》就係四哥謝賢、張文慈及黃浩然,而《多功能老婆》就係有黃浩然、陳煒及朱晨麗。

冇咗歐陽震華感覺爭啲

《法證先鋒》系列第一至三輯都好評如潮,唔少人更認為係經典神作。當中頭兩輯都搵嚟歐陽震華擔正,佢喺劇中飾高級化驗師高彦博Tim Sir,深受觀眾喜愛。去到《法證先鋒III》就嚟個大換血,男主角由原來嘅Bobby換上黎耀祥,而嚟到《法證先鋒IV》就換上黃浩然,唔少網民都認為冇咗歐陽震華成個感覺爭咁啲、仲覺得冇佢有啲失落同遺憾。

《法證先鋒IV》劇照
《法證先鋒IV》劇照
《法證先鋒IV》劇照
《法證先鋒IV》劇照