【鄭生變任生?】鄭伊健巡迴演唱會宣傳板相片變咗任賢齊?

鄭伊健

當年鄭伊健憑住《古惑仔》電影系列飾演陳浩南一角紅遍中港台,特別係佢嘅招牌長髮造型,當年成為唔少人嘅模仿對象。而佢嘅《Along With Ekin Live Concert》世界巡迴演唱會,繼香港、美國拉斯維加斯及澳門等地方後,早前已開始進軍內地。喺上月29日,演唱會武漢站已經完滿結束,而廣州及成都站亦計劃進行。不過近日有網民發現成都站嘅宣傳板,竟然出現任賢齊(小齊)嘅相片,而唔係鄭伊健。

鄭伊健演唱會宣傳板,竟然出現任賢齊嘅相片
鄭伊健演唱會宣傳板,竟然出現任賢齊嘅相片

究竟係咪內地嘅公關公司鄭生、任生傻傻分不清楚定點,竟然搵咗同鄭伊健髮型有幾分相似嘅任賢齊(小齊)嘅相做宣傳板上那幅九宮格圖片。好亂呀!究竟係鄭伊健演唱會定係任賢齊演唱會呀?唔少網民睇完都話表示無言,紛紛留言:「我早上也看到了,好無語」、「傻傻分不清楚」、「笑死我了」及「哈哈哈,台灣鄭伊健」等等。

其實除咗伊健將會喺成都舉行演唱會之外,小齊喺啱啱過咗嘅7月6日亦喺成都舉行咗演唱,所以有網友認為係公關公司資金有限,兩個活動喺同一個地方搞,慳慳地用返同一塊宣傳板。反正大家都係長頭髮,冇人會發現嘅。