鄭中基爆李璨琛猜輸 吮朱咪咪腳趾

東方日報
細仔在台上周圍走,鄭中基出手捉住。


鄭中基於尾場紅館騷與電影中的黃金組合重聚,大爆李璨琛當年對要真吮朱咪咪腳趾耿耿於懷,笑言下次要交棒給其他人。而「三代同堂」環節加入細仔Evan,失控亂跑最後被工作人員綁落台。


五場《鄭中基ONE MORE TIME世界巡迴演唱會》前晚尾場,鄭中基(Ronald)於Encore環節邀請李璨琛、張達明及谷德昭三位電影拍檔,Ronald大爆當年拍攝第二集的內幕,指李璨琛有一事耿耿於懷:「嗰時猜包剪揼猜輸咗要吮朱咪咪腳趾,事實拍咗3個Take佢都係猜輸!」李璨琛說:「真猜、真吮o架!但我吮夠啦,畀第二個吮啦!」谷德昭笑言現時唯獨欠劇本及資金,故即場眾籌集資,大唱《財神到》向Fans𢭃利是。


台上施展麻鷹捉囝囝


另一亮點落於「三代同堂」表演後,4歲細仔Evan拎住豬公仔跳上台送給Ronald,又Sweet爆與家姐及Ronald攬攬,不過攬完開始橫衝直撞,搞到眾人冇晒符,Ronald喪叫停兼利誘他向Fans拜年𢭃利是,但Evan沒有理會,最後Ronald要施展麻鷹捉雞仔技能,再由工作人員抱仔落台。


完騷後設慶功宴,Ronald透露今年8月會原班人開拍《龍咁威3》,並於2020年賀歲檔上映,已有劇本,但要為角色減磅。講到今次開騷聽到不少聲音指少唱自己歌,他重申揀歌是有特定主題:「今次係想唱之前未唱過嘅歌,同Emma合唱嗰Part啲歌係佢揀。(佢唔怯場好淡定。)我都唔明,我都驚,佢真係唔驚!又冇人教佢唱歌。(介唔介意佢入行?)讀完書先啦!不過佢好有表演欲。(囡囡幾錢歌酬?)好慳o架!每日一粒糖就好開心!」


提起第三場邀請前《美女廚房》主持拍檔梁漢文及方力申擔任嘉賓,表示有意開拍《美男廚房》,及後ViuTV即時於Facebook官方Page出Post指隨時準備合作,他聞言打趣說:「咁佢搞錯咗,我哋成晚都係講Post喺我哋個T Viu B度。(會令ViuTV好失望?)佢Get錯咗啫!我哋都可以合作。(轉播?)都好!可以斟吓!」

鄭中基(左起)、李璨琛、張達明及谷德昭,大爆當年拍戲的內幕放笑彈。

 

是日精選

 

爭女兒撫養權-與前妻對簿公堂-迪尼路搞離婚-向司機發火

唐詩詠孖教育界新歡打洩戀情

坤哥晉升新-代-師奶殺手

熊黛林-收工-唔追豬仔

張曦雯感情空白-獨-到想喊

回顧56歲周星馳年輕經典相-當年青春氣息澎湃

連詩雅拎獎合照證清白

15年前舊照曝光-林志玲pk周子瑜-網-光這點就選-她

狂收利是籌錢拍-龍咁威3-鄭中基尾場騷細仔上台失控