郭思琳美麗有罪「打」爛花瓶

東方日報
郭思琳精緻五官加上一雙長腿,夠晒煞食!

被封為「格鬥女神」的郭思琳(Margiela)由模特兒入行,近幾年轉型當演員,她自言曾經有導演指她樣子過於精緻,令她下定決心證明自己並非花瓶,她曾修讀演技課程及電影動作班,巴西柔術更達紫帶階段,除了有樣之外,既打得又演得。

Margiela坦言也有導演要求她在戲中騷身材:「我做模特兒時底線都好低,試過全裸影硬照,影出嚟靚就接受到,所以劇本好我係絕對接受,為露而露就唔可以。」由於她在格鬥真人騷的形象深入民心,故此在電影上除了文戲外,不乏動作場面,但首次拍打戲已經受傷:「當時我着住泳衣同一對唔啱size嘅高踭鞋,我要踢向武指,但我反而踢傷自己小腿,腫到半個乒乓波咁大。我冇驚咗打戲,反而想拍多啲,希望可以將巴西柔術用喺動作電影上!」

影后面前失準爆喊

講到難忘場面,除了受傷之外,她亦試過在影后面前表現失準:「同期拍緊兩部電影同一部網劇,前一晚拍完通宵打戲,第二日要拍文戲,可能體能透支,當時個腦一片空白,雖然只有幾句對白,但講極都講唔到,我嘅對手係一個影后級前輩,仲要有四、五十人嘅群戲,當時真係好內疚、好大壓力,一拍完我即刻衝咗入廁所喊,之後有段時間怕咗群戲,直到有次再演群戲,我當時需要喊,第一take我喊唔出,導演叫我放鬆啲,最後克服到,現場所有人都拍晒手,甚至有工作人員睇到喊,呢件事令我有番自信。」

Margiela有感在演藝事業上起步太遲,故想先專注事業,感情放一邊,問到擇偶條件?她說:「要畀到正面影響我,我好抗拒負能量,最好係知識分子,可以喺佢身上學到嘢,如果有一個巴西柔術師兄做男友都好,一定可以令我技術再昇華。」

郭思琳專注發展事業,拍拖遲啲先講啦!