郭富城父女檔舞唱神曲

東方日報
城城使出招牌舞步,夠晒煞食。

天王郭富城婚後以家庭為重,近日更開拓小朋友市場,將自己經典金曲舞步融入兒童神曲中,結果掀起全城熱潮,他與囡囡Chantelle合跳拍下短片留念,城城直言不排除日後公開的可能,認真Sweet爆!

近日城城獲邀將兒歌界神曲《Baby Shark》,加入其經典金曲《對你愛不完》及《唱這歌》的「指定動作」,改編成「郭富城版舞蹈」。他昨午現身尖沙咀與大批小朋友齊齊跳唱,吸引大批市民圍觀。城城提起囡囡即一副冧樣,自爆出門口時「大寶」(大女Chantelle)剛瞓醒,與他穿父女裝,低調地跟他到場,相當溫馨。

囡囡有音樂天分

談到開拓小朋友市場,城城直言有私心:「原來小朋友都有佢哋嘅神曲,呢首歌好吸引小朋友嘅眼球,大人都鍾意,囡囡扭計就會自己開電子產品嚟聽呢首歌,依家每次我跳,佢都錫同攬吓爸爸,又會同我一齊跳仲拍咗片。(公開片段?)以前我好抗拒,仲叫大家唔好兜口兜面影佢,依家覺得可以考慮,但等佢大啲先。(佢有呢方面潛質?)絕對係,佢依家上緊啲音樂班。」

陪老婆公園漫步

他再次表示婚後「擁有另一個世界」,11月才開拍高科技偵探新片的他,這段時間除做準備工夫外,又盡量抽時間陪伴家人,做好父親及丈夫責任:「大寶依家上N班,第一日送佢返學好感動,覺得佢都需要學習過群體生活,之前中秋節我帶晒成家人陪我去台灣開騷。我覺得要多啲帶小朋友出去玩,見識吓呢個世界。(影到你同太太深宵行公園。)講個秘密大家知,我好鍾意行公園,太太懷孕時我哋成日去,覺得好浪漫,公園環境同空氣都好啲,大家可以去嗰度撞吓我。」

講湊女經眉飛色舞的城城,話考慮公開囡囡萌樣。
已為人父的城城與小朋友跳唱兒歌。