【那些我愛過的人】馬貫東做過攝影助理健身教練 曾開食肆因為呢個原因結業

《那些我愛過的人》劇照

馬貫東憑處境劇《愛·回家之開心速遞》「博士」秦博思一角彈起,近排仲喺劇集《那些我愛過的人》入面首次擔任第二男主角,仲要挑戰飾演患有亞氏保加症嘅醫生古希晨,演技被觀眾力讚,前途似乎無可限量!

馬貫東望落非常後生,但原來佢已經33歲,而且入行更已經長達14年!而馬貫東亦同好多其他追夢嘅人一樣捱過一段好長嘅時間。

馬貫東係07年藝訓班畢業,同屆有張頴康、樂瞳及楊明等等,但係馬貫東就冇一班同學仔一樣咁快上位。入行頭幾年做嘅角色分分鐘連對白都冇,甚至仲被大台同事以為佢係道具部員工,而且頭五年嘅時候每逢月尾戶口結餘都係零!做演員唔可以當飯食,所以當時馬貫東唯有身兼多職,婚紗攝影助理及健身教練等咩都要做。

馬貫東係單親家庭長大,有一個好錫佢嘅媽媽同兩個家姐,媽媽仲喺15年打本俾佢開專賣熱狗同手工啤酒吧,鋪頭一開始頭三個月已經有錢賺。可惜後來馬貫東因為同拍檔意見分歧,經營咗一年左右就結業離場,損失近六位數字。佢當時覺得除咗所有心血化為烏有好難過之外,亦因為蝕咗媽媽嘅血汗錢非常心痛,一直非常內疚嘅佢就話一直都有個心結,唔知點樣可以報答家人嘅付出同支持,希望日後可以有一個舒適嘅家庭俾佢哋。

雖然生活逼人,但係馬貫東仍然無放棄過拍劇嘅夢想。去到17年佢終於同無綫簽訂經理人合約,收入終於有所改善,更開始獲得一班監製賞識。小編話,馬貫東有才華又有毅力,一定會受到別人賞識,所以各位追夢嘅人都記住唔好放棄呀!

馬貫東
馬貫東
馬貫東