《那些我愛過的人》愛情小品首播 一文睇清無綫近年同類型劇集

無綫新劇《那些我愛過的人》首播,由林文龍、黃翠如,連詩雅及馬貫東等人飾演,劇情主要講述7年前一宗交通意外令姜煜誠(林文龍飾)及方樂汶(黃翠如飾)各自失去咗另一半。事隔多年後,另一次交通意外令佢哋相遇,之後佢哋更衍生好多謎團及錯綜複雜嘅關係。今年無綫播出多套警匪劇,宜家終於有愛情小品劇集播出。其實無綫過往都有唔少愛情小品劇,而家就同大家重溫一下近年嘅愛情小品劇集啦!

《那些我愛過的人》 劇照

《婚姻合伙人》(2019年)

土地問題一直困擾香港,由楊明及高海寧主演嘅愛情喜劇《婚姻合伙人》就係以香港地產業作為背景,講述貝競枝(高海寧飾)自細愛錢如命,而郎朝勇(楊明飾)就對貝競枝一見鍾情,仲暗戀佢好多年,之後佢哋仲由情侶發展到夫妻關係,佢哋更合作經營劏房到開地產代理公司。除咗楊明及高海寧呢一pair之外,陸永同林秀怡飾演嘅歡喜冤家,成功產生化學作用,製造唔少笑料,深得觀眾喜愛。劇集題材貼地,加上輕鬆搞笑,所以劇集口碑都唔錯㗎!

《婚姻合伙人》劇照

《多功能老婆》(2019年)

由楊千嬅、周柏豪、黃浩然、陳煒、朱晨麗及洪永城主演嘅《多功能老婆》,淨係演員陣容已經吸引唔少觀眾收睇。劇情主要講述藍飛(楊千嬅飾)與「花心男」尚劍雄(黃浩然飾)原本有一個幸福嘅家庭,不過因為第三者顏成功(于淼飾)介入導致離婚收場。之後,藍飛租出一間房間俾榮浩田,原本只係諗住減輕租金負擔,但到最後竟然日久生情。周柏豪喺劇中飾演嘅大暖男Oppa浩田,一次又一次維護藍飛,仲對藍飛兩母子照顧有加。除咗成功俘虜「姐姐」藍飛之外,仲冧到唔少女觀眾。雖然一個失婚婦人配上一個二世祖唔係咁討好,不過憑住佢哋嘅行動證明,所有嘢都唔係問題。

《多功能老婆》劇照

《愛我請留言》(2014年)

劇集由黃翠如及黃浩然主演,雖然劇集唔係大製作,但故事製作有心思及有實感,當年深得觀眾喜愛。劇情主要講述玻璃藝術家樂天送(黃浩然飾)與記者茹初見(黃翠如飾) 同樣對生命帶著遺憾,佢哋喺街頭漫步,互相陪伴。之後,初見唔想自己後悔,於是借咗樂天送嘅電話留言俾追求者張日熙(洪永城飾)。後來,初見發現男友日熙同其他女仔有曖昧訊息,就明白佢哋嘅關係開始疏遠,所以決定放手。劇集成功將生活真實一面描寫得淋漓盡致,唔少觀眾都睇得又喊又笑。

《愛我請留言》截圖

《情越海岸線》(2013年)

由陳展鵬、黃浩然、李詩韻及陳茵媺主演嘅《情越海岸線》,劇集喺長洲取景,以情愛糾結為題,劇集除咗講小島嘅人情味之外,當然唔少得講程禮榮(陳展鵬飾)、張寶生(黃浩然飾)、鄭抱抱(陳茵媺飾)、郭希雯(李詩韻飾)錯綜複雜嘅愛情故事啦!

《情越海岸線》(網上圖片)

《我瞞結婚了》(2017年)

大家有冇試過與另一半喺同一間公司工作,不過又唔想被人將自己感情事當作茶餘飯後話題呢?由洪永城及黃翠如主演《我瞞結婚了》就講述Tony(洪永城飾)與Janet(黃翠如飾)係情侶,但因一次飛機意外令佢哋唔想錯過對方,而選擇馬上結婚。後來,佢哋竟然喺同一間公司工作,但因為Janet上司婚姻關係破裂,所以唔喜歡自己下屬已婚。另外,因為高薪嘅關係,Janet與Tony都冇公開已婚身份,結果換來Lucas(黃浩然飾)同Kay(傅嘉莉飾)介入,導致四角戀關係。

《我瞞結婚了》劇照

《愛情食物鏈》(2016年)

由小儀、金剛、陳智燊、及高海寧等主演嘅《愛情食物鏈》,聽落好似同食物有關,其實劇集將愛情比喻為食物鏈,講述洪鱻(金剛飾)及魯佳芳(小儀飾)都唔希望另一半條件差過自己,所以就去追求條件好好嘅高貴芬(高海寧飾)及劉柏業(陳智燊飾)。

《愛情食物鏈》(網上圖片)

《載得有情人》(2014年)

由好戲之人黎耀祥及蘇玉華主演嘅《載得有情人》,講述重情重義嘅小巴司機祁逸昇(黎耀祥飾),努力將前女友同其他人所生嘅仔撫養成人。蘇玉華飾演嘅集團掌舵人饒毅昕,因為一場交通事故令佢好欣賞祁逸昇,之後仲請埋佢做私人司機,展開主僕關係。不過之後佢哋感情日漸昇華,最終打破身份階級界限,戀情成功開花結果。

《載得有情人》劇照

《單戀雙城》(2014年)

由陳展鵬及陳茵媺、洪永城及楊明主演嘅《單戀雙城》,劇組遠赴吉隆坡與檳城取景。劇情主要講述羅式適(陳茵媺飾)因工作關係飛到檳城,男朋友程展博(楊明飾)原本打算求婚,不過喺訂婚派對中被人播放出一段出軌片段,而第三者仲係式適好姐妹黃淇英(高海寧飾)。而式適喺檳城工作時認識陸恭梓(陳展鵬飾),佢哋不打不相識,後來仲擦出愛火花。不過當式適返香港後又被前男友展博纏繞,搞到佢唔知點算好。

《單戀雙城》(網上圖片)

《全職沒女》(2017年)

現今香港好多女性只要年過25歲就俾人叫「中女」嫁不出叫「剩女」,冇事業、資產及愛情就叫「沒女」,不過其實好多女性樂在其中自己一人。《全職沒女》搵嚟陳松伶(松松)及張兆輝擔正,劇集以沒女為題材,講述恨嫁沒女羅麗晶(陳松伶飾)參加大翻身比賽,點知主辦人正正就係當年有過一夜情的莊富豪(張兆輝飾),不過莊富豪完全唔記得佢。後來,羅麗晶去咗仲夏夜花園酒店工作,慢慢同莊富豪建立主僕關係,擦出愛火花。

《全職沒女》劇照