【那些我愛過的人】劇評讚夠正面!多靚女配搭新鮮有驚喜

由林文龍、黃翠如、馬貫東及連詩雅主演嘅愛情小品劇《那些我愛過的人》,已經播咗差唔多兩星期,喺網上都有幾高嘅討論度,而且評價都幾正面。

好睇有驚喜 

今年無綫播咗唔少警匪及查案嘅劇集,難得播出《那些我愛過的人》呢類愛情小品,不過佢又唔係一般「喊死人」嘅悲情戲,有唔少感動位同笑位,令觀眾睇得有笑有淚,唔少網民都話好睇同比預期有驚喜。

演員配搭新鮮 感情線又吸引

無綫劇集成日被指演員配搭冇新意,嚟嚟去去都係嗰啲演員,但依套劇竟然搵咗林文龍配黃翠如、馬貫東配連詩雅。另外,唔少網民都話好鍾意睇朱嘉炳(顧定軒飾)同姜子優(蘇皓兒飾),覺得好清新,令人眼前一亮。

《那些我愛過的人》劇照
《那些我愛過的人》截圖

黃翠如演技有進步

黃翠如入行多年一直被指演技差,全部劇都一樣,仲以「世界級演技」去挪揄佢。但唔少網民認為《那些我愛過的人》可能係黃翠如翻身之作,唔少場口都見到佢有內心戲,例如劇中佢飾演單親媽媽方樂汶,早前就講佢奶奶(馮素波飾)突然過身,佢攬住個女好冷靜咁喊。再之後佢約咗陳自瑤傾偈飲嘢後,巧遇林文龍並講自己嘅遭遇。雖然黃翠如兩場戲都冇大喊,但都完全感受到佢好傷心。不過都有網民彈佢演技,認為佢最大問題係用氣聲,感覺有點兒做作。

《那些我愛過的人》截圖

多靚女

《那些我愛過的人》搵咗唔少靚女演員演出,例如黃翠如、連詩雅、陳自瑤及蘇皓兒等等,要身材有身材,要後生一樣有, 真係符合晒唔同年紀嘅男觀眾。

《那些我愛過的人》截圖
《那些我愛過的人》劇照

馬貫東演亞氏保加症醫生似《Good Doctor》

馬貫東喺劇中飾演患有亞氏保加症醫生古希晨,外表單純,性格率直,但因為缺乏社交能力而被排斥。馬貫東嘅角色同美劇《Good Doctor》中嘅角色好似,唔少網友都話無論眼神、語氣定係動作都抄到足。

《那些我愛過的人》劇照

細路女可愛又好戲

童星黃芷晴飾演黃翠如個女幸而,唔少網民都話佢演繹得非常好,投入而不造作,無論動作同表情都表現得好好,好討人歡喜。唔少網民都留言大讚佢:「妹妹好可愛,又好戲,好耐冇見過咁識做戲嘅香港小朋友」、「扮醫生嗰度好可愛,最後俾藥病人唔洗錢。」及「做得好自然,又得意」等等。

《那些我愛過的人》截圖