邊位演員飾演學生最冇違和感?

無綫台慶劇《解決師》嘅校園情節係其中一個重要嘅構成部份,飾演學生就緊係搵一班較為嫩口嘅演員,而家就同大家睇下過往演員飾演學生嘅例子啦!

丁子朗

2016年參選香港先生而入行嘅丁子朗,短短幾年參與拍攝嘅節目同劇集都唔少,睇嚟佢都係無綫嘅重點培養新人。現年22歲嘅佢,著起套校服入型入格。喺劇中唯一同真學生身份有啲出入嘅就係佢副身材,喺學生之中真係少見啲!

黎諾懿

黎諾懿喺《愛回家》飾演馬壯,可以話令佢一炮而紅,工作量大增!但其實出道嘅時候佢就係由青春劇開始。《當四葉草碰上劍尖時》係《四葉草》系列嘅第一輯,當時20多歲嘅黎諾懿同而家嘅丁子朗情況相似,小鮮肉飾演學生又點會唔受歡迎呢?不過,黎諾懿當年嘅造型又好似有啲似台灣嘅「F4」喎!

袁偉豪


袁偉豪都曾經飾演過學生哥,《尖子攻略》以中學足球隊為背景。而羅仲謙喺呢套劇先至係被捧嗰一位,而當時袁偉豪只不過係配角。唔知今年《鐵探》會唔會幫袁偉豪爭返一口氣?

何廣沛

之前嗰幾位都係初出道嘅時候飾演學生,何廣沛就竟然28歲嘅時候扮中學生。《親親我好媽》佢演一個反叛中學生Hayden,但竟然冇格格不入嘅感覺,童顏就係佢嘅秘密武器!

江嘉敏

扮演學生不得不提江嘉敏,佢出道拍電影係飾演學生,之後幫香港電台拍攝幾套劇集又係飾演學生。江嘉敏喺《親親我好媽》飾演品學兼優嘅乖學生Venus,佢憑呢套劇集令到更加多人認識佢。江嘉敏樣子甜美、笑又甜,性格又可愛,唔搵佢做學生妹就真係講唔過啦!

簡淑兒

比是是非非影響到發展嘅簡淑兒,拍《愛.回家》成為女神之後,就接拍劇集《迷》!佢憑招牌腰果眼,深得網民歡心。喺《迷》中飾演田蕊妮女兒Chloe,雖然戲份唔算多,但點都可以喺田蕊妮身上偷下師!另外,喺See See TVB網劇《我們與合格的距離》上個月尾播出嘅單元,佢再一次飾演學生。