【進擊的小三】細數近年無綫劇集搶眼「小三」角色

一套劇嘅成功除咗男女主角要搶眼之外,總有一啲角色令人深入民心。而女藝人就相對比較著數,因為佢哋可以飾演第三者等反派,呢類角色形象鮮明又突出,每次佢哋一出場都會睇到觀眾咬牙切齒,令觀眾留下深刻印象。今日就同大家重溫一下近年無綫劇集嘅第三者角色啦!

《多功能老婆》Joey(陳庭欣飾)

最新劇集《多功能老婆》係今個星期開始播出,第一集角色鋪排已經非常分明,多角人物關係亦清清楚楚。身為劍雄(黃浩然飾)秘書嘅Joey(陳庭欣飾),同上司有不尋常嘅關係。去日本工幹時唔甘心被狠撇,為咗報復佢竟然全裸咁對住大婆藍飛(楊千嬅飾)攤牌講清楚。Joey更大露背露Pat咁同藍飛講:「我冇生過BB,我生肖細你一個圈有多,點都係我優勝過你呀。」咁樣赤裸對住正印講野,真係夠哂薑呀。

《愛回家之開心速遞》池美麗 (鍾凱琪飾)

當大家以為金城安(周嘉洛飾)與Bonnie(林凱恩飾)感情穩定,打風都打唔甩之際,佢哋之間突然剎出一個池美麗(鍾凱琪飾)。以契兄與契妹相稱嘅安仔及美麗經常出常入對,安仔去邊美麗就會跟去邊。池美麗仲周不時送上食物及禮物,美麗仲對安仔猛烈攻勢,完全當Bonnie透明。安仔為咗安撫Bonnie,經常好堅決咁表達自己專一嘅愛意,但呢啲時候池美麗就向Bonnie宣戰講明要搶走安仔。期間有一次因為意外令到美麗同安仔一齊被困貨櫃,喺危急關頭美麗仲保護安仔,安仔深受感動。雖然美麗對佢係好好,不過好彩安仔嘅心都係向住Bonnie。

《溏心風暴3》王以愛(陳敏之飾)

本身係一個性格古板、工作認真亦唔識講笑話嘅以愛,佢對有婦之夫Nic(唐文龍飾)有好感,而且更越踩越深。其中有一幕就講到以愛同Nic喺水中激咀令人最印象深刻。最終Nic恨心撇下以愛返回老婆及囡囡身邊,以愛仲死纏唔放呢一幕咁啱俾父母(夏雨及李司棋飾)睇到,最後李司棋仲掌摑兼鬧佢不知羞恥。

《不懂撒嬌的女人》田蜜(高海寧飾)

高海寧喺劇中飾演攻於心計嘅田蜜,成個心機女一樣,幾乎對所有男性物體都係「有殺錯,無放過」。嗲功超強嘅佢扮可愛與Gordon(林文龍飾)一齊食雪糕,食每一啖露出姣樣,仲試過胸壓對方。更約Gordon老婆(宣萱飾)表明要做公司會員,更講明瓜分Gordon。

《名門暗戰》飾演余詩琳Ivy(李佳芯飾)

2014年台慶重頭劇《名門暗戰》,搵咗唔少重頭藝人出場,但講到搶眼角色,真係非余詩琳Ivy(李佳芯飾)莫屬。劇中飾演名門岳華嘅情婦Ivy,今次大玩唔係第三者挑戰大婆,而係經常楚楚可憐樣大玩與對方係真愛嘅情境,更有埋岳華BB,與大婆關菊英大鬥演技。

《來自喵喵星的妳》藍蒂莎Natasha(楊秀惠飾)

劇中飾演Natasha嘅楊秀惠,要不停地著超窄身連身裙,露出長腿,經常要勾引薛丁甲(陳豪飾)。陳豪於劇裡傻更更角色,再配上姣到不行了嘅楊秀惠,真係一個好特別嘅組合。楊秀惠有時脫鞋著黑絲嘅造型再挑薛丁甲對腳,呢種舉動真係寧捨搶眼。其中第7集有幕穿著黑色低胸晚裝,配對半透黑色絲襪,再加姣功將對腳放上陳豪面前,睇到觀眾相當肉緊。

《幕後玩家》葉燁Emma(劉佩玥飾)

劉佩玥以往俾觀眾一種乖乖女嘅感覺,不過佢今次喺《幕後玩家》仲飾演一個風騷又賣弄性感嘅第三者,估唔到都入型入格,唔少觀眾睇完都鬧爆Emma。劇中劉佩玥飾演黃宗澤嘅第三者,而黃宗澤老婆更係自己好朋友龔嘉欣。劉佩玥經常引對方上床之餘,更大膽約龔嘉欣到咖啡店攤牌講明自己係第三者,更曾經為咗可以繼續留得住黃宗澤個心,就算曾經小產都忍瞞講大話。

《女人最痛》Stephy(陳自瑤飾)

陳自瑤(Yoyo)喺劇中出盡本錢去飾演一位狐狸精,破壞林嘉華及米雪嘅婚姻。飾演高齡太太嘅米雪為林嘉華冒險生仔繼後香燈,不過劇中經常穿著堅尼晒事業線,性感盡露,於辦公室內更發嗲功姣功嘅陳自瑤將自己送上門咁送俾林嘉華,角色成功惹人討厭。

《戀愛季節》陸思美(賈曉晨飾)

本身賈曉晨俾人感覺有種狐媚嘅感覺,所以好多戲佢都飾演壞女人。喺劇集《戀愛季節》中就做狐狸精要搶胡定欣老公梁烈唯,多次騷胸及上床,更與梁烈唯有一場激烈吻戲,務求做一個為搶男人而不擇手段嘅第三者。

《拳王》莊寶琪(龔嘉欣飾)

劇中嘅莊寶琪係個典型短衫短褲,賣弄性感嘅壞女人,專門向有婦之夫兜搭。最估唔到係最初兜搭嘅竟然係姐夫黃德斌,因為對方專一令佢唔可以埋手,就轉向黃浩然。佢主動勾引對方上床,仲要專拆散人地幸福家庭,為咗自己開心,自私搶人老公。