連詩雅遭騙財:睇清一個人

東方日報
被問到婚期,連詩雅表示想先專注事業。

連詩雅自爆有興趣與人合資買樓,但要很信任對方才可以,又乘機讚男友徐浩人品好。她又自爆曾遇好友「唔熟唔食」,被騙五位數。

歌手連詩雅(Shiga)昨日到電台宣傳,自爆試過被相識十多年的朋友呃錢:「覺得佢唔會呃我,所以幫到就幫,但原來唔係嗰回事,可以睇清一個人嘅改變。(呃咗幾多?)只係五位數,所以人格好緊要。」至於男友徐浩人格如何?她說:「暫時OK,兩個人相處要好多嘢加埋,但佢人格係好。」

阿媽唔准婚前同居

問到可會與男友婚前合資買樓?她說:「我想撩朋友一齊買,因為一個人負擔大,不過媽咪就唔畀我婚前同居,所以冇。合資買樓要好信嗰個人先得,因為好大責任。」又笑指如果合資置業,反而男友可能會擔心:「我覺得佢會驚我走佢數。(你更加要撩佢買?)結婚先啦,兩個一齊幾好,但未結婚唔知會點,始終自己單親家庭,對婚姻同愛情都會有少少影響。我覺得結婚好似離我愈嚟愈遠,轉咗新公司,依家好似啱啱升大學咁,所以想努力工作先,已經過咗30歲最想結婚嘅時候,結咗婚做嘢又難分身,而且出年入行10年,都想做啲嘢紀念吓。」

講到新歌《說分手》,內容表達勸人分手,她說:「如果另一半對自己唔好,不如灑脫啲分手,呢首歌比較rock,都係轉咗新公司新嘗試。」問分手時是否夠灑脫?她說:「細個可以,但大個唔得,因為好多嘢兩個人都有牽涉,例如一齊養嘅寵物。」