連詩雅遇男友出軌早知早接受

東方日報
連詩雅係咁出力踢,唔通當咗陳嘉莉係小三?

歌手連詩雅(Shiga)與陳嘉莉(Kelly)因拍攝網劇《性敢中環》而成好姊妹,面對假設男友出軌問題,Shiga情願知道真相,與男友一齊跨過感情缺口;Kelly笑言第六感最強,可感應「小三」氣場,絕對不容向男友埋身。

近年女仔間交心叫「閨蜜」,講心事、講男仔經、但正所謂最親最信賴的朋友,往往最難防,聽過不少閨蜜變「小三」。Shiga與Kelly幸好未遇過被閨蜜「背叛」,Kelly自言第六感最厲害:「我會Feel到!加上揀朋友好謹慎,唔係輕易同人交心。」若然目擊好友的男友出軌,可會踢爆?她覺得先衡量情況:「如果佢好鍾意個男仔,就算講咗件事,佢都會原諒個男仔。」Shiga則代入女方角度:「以前我比較天真情願唔知,到人大咗就寧願知真相!如果係咁我會揀早啲知,再去選擇接唔接受,如果接受到,就一齊睇吓能唔能夠捱過呢關。」

謝絕晒相放閃

很多人閒時在社交網「打卡」,分享生活軼事,Shiga自爆最愛「相機食先」,但一張男友徐浩的相也欠奉,她笑說:「任何帳戶都唔會出現!(男友會唔會嬲?)唔關私唔私人事,喺互聯網就算幾私人都有機會被盜用,放得上網就冇私人可言。」難怪聽到情侶分手要刪相,Shiga即說:「所以我唔Post囉!人生任何事都會發生嘛,所以直到結婚前都係唔Post好啲。」Kelly則認為與時並進:「以前係一張張相,分手後要燒咗佢,依家都係Save埋佢一邊。」Shiga即笑說:「咁又唔需要燒,會放喺迷你倉,唔會睇,但就知永遠喺度。」

人生經歷每段感情總留下不少回憶,Kelly認為當中的好與不好,都是令人成長的一課;Shiga則自言可能在娛樂圈令人加速成長,處理感情已到「化境」,學會活在當下。

場地:xBattle

連詩雅與陳嘉莉分享如何處理分手後的「回憶」。
陳嘉莉對付男友身邊的飛來蜢,絕不留手!