迪士尼Sony傾掂數 《蜘蛛俠》重回Marvel英雄行列

迪士尼Marvel同Sony影業都幾似對鬧晒交、雙方出哂聲明分手,結果事隔個月又宣佈復合嘅銀幕情侶。雖然2間公司刀來劍往嘅過程為娛樂版提供咗多個頭條,不過花生食得多會滯,然後最受苦嘅應該係佢地愛的結晶「蜘蛛佚」同班fans呀!

話說上月迪士尼同Sony就片酬分成問題傾唔掂數,又以MCU(Marvel Cinematic Universe)呢個空間有太多故事要發展,所以漫畫創作主腦Kevin Feige將會抽身,唔再參與《蜘蛛俠》個人電影系列嘅創作,變相同蜘蛛仔割蓆,將佢踢出MCU宇宙!

有跟開超級英雄電影嘅朋友都知,Sony早早於2002年Tobey Mcguire版成功打造《蜘蛛俠》,打破無數票房紀錄。可惜長江後浪推前浪,沿用嘅英雄電影方程式唔再work,2012年改由Andrew Gardfield飾演嘅新版蜘蛛俠,成績不如預期,呢個版本直頭失敗!

最新版本由Tom Holland飾演蜘蛛俠,今個系列加入Kevin Feige嘅腦汁,成功將角色翻生,將以往孤僻又壓抑嘅Peter Parker變成時下青少年,醒得嚟有少少毒,不過活潑好多!加上落重本舖路捧蜘蛛俠做鐵甲奇俠嘅接班人,條故事線即刻豐富哂,當然神來之筆仲包括令梅姨變成索爆中女!

所以上月迪士尼、Sony宣佈分手時,fans最擔心係蜘蛛俠會跌返落舊有創作框框,無哂Marvel式幽默,同埋無人撐起《復仇者聯盟》後新一頁。不過呢頭眼淚都未抹乾,佢地已經宣佈復合!根據外媒Variety上星期五嘅報導,Kevin Feige將會回歸、參與製作《蜘蛛佚3》,Tom Holland飾演嘅蜘蛛俠仲至少會出現喺一套MCU電影入面!

傾掂數嘅條件係Sony要賺少啲,由原先Marvel只抽5%利潤改為同Sony各抽25%影片利潤,而迪士尼繼續擁有週邊商品銷售權,亦只需投資拍攝成本嘅25%!條件未必對Sony有利,不過蜘蛛俠作為佢地最大隻金蛋,賺少啲好過無得賺,所以搞完場大龍鳳,Sony高層Amy Pascal出聲明話好開心再次合作,之前啲不和鬧劇好似無發生過咁!