迪士尼收購霍士 新片被抽起 Amy Adams或成最後輸家?!

早兩日報導過迪士尼收購電影公司20世紀霍士,除咗影響一眾員工,影響成個電影業界佈陣,仲居然影響咗女星Amy Adams爭影后!

話說霍士旗下最後一個電影project,就係由Amy Adams主演嘅驚慄電影Woman in the Window。套戲算係難得一遇筍盤,講成人題材,同時有票房保証及得獎潛力,係霍士高度重視嘅作品。

改編自同名暢銷小說嘅Woman in the Window,講述由Amy Adams飾演嘅Anna Fox患有廣場恐懼症(Agoraphobia),終日只能留在紐約家中,飲酒睇舊電影同監視對面鄰居一舉一動消磨時間。住對面嘅Russell夫妻及其兒子一家樂也融融的生活,成為Anna嘅避風港,直至一日佢目擊鄰居屋內嘅命案。

故事引人入勝在於Anna因為酗酒濫藥問題導致其口供失信,佢亦開始質疑自己所見,備受不能分辨幻象與真實困擾。電影相信會有幾多Anna嘅心理描述,疑幻疑真嘅推理舖陳。片中嘅Russell夫妻將會由好戲之人《黑暗對峙》金像影帝Gary Oldman同《永遠的愛麗絲》Julianna Moore飾演,由《愛.誘.罪》導演Joe Wright執導。

電影上年8月於紐約開拍,霍士本來排咗今年10月4日上畫,呢個映期完全係為咗攞獎造勢。因為各大電影獎項陸續於年尾至出年2月舉行,10月先上嘅話,班影評睇完無耐,仲記得套戲講咩,絕對有助得到各大影評獎青睞,順理成章於金球獎同奧斯卡嘅呼聲自然提高。再者,Amy Adams已經6次提名奧斯卡,如果再次提名,排隊都排到佢啦啩?

霍士以呢個玩法,成功將《失蹤罪》、《NASA無名英雌》等推上奧斯卡舞台,不過依家個如意算盤去到迪士尼手上,就唔同計法。早前電影公司安排試映會睇反映,結果觀眾反映話故事Anna經常於幻象同現實之間,好混亂睇唔明,迪士尼因此決定下個月重拍其中幾場,而映期亦會延至2020年!

精益求精固然好,但最怕就咗觀眾口味而無咗套好戲。你見荷里活電影海報就知,點解無論咩片種,總之大片就係大堆頭哂冷咁擺哂啲星出嚟? 咪就係focus group啲觀眾話咁樣最吸引囉。