【農曆七月鬼門開】唔出夜街煲劇應節 精選近年亞洲好睇靈異題材劇集

今日就係農曆七月十四日,相信唔少長輩都會同大家講7月唔好出咁多夜街,咁留喺屋企有咩做嚟應節呢?除咗睇電影之外,不如煲下劇啦!今日我哋就精選咗近兩年亞洲好睇嘅靈異題材劇集,總有一套啱「又要驚又要睇」嘅你!

香港:《詭探》(2017年)

由ViuTV 出品嘅《詭探》播出後好評如潮,以香港都市傳說作為背景,當中仲牽涉盛傳已久,香港警隊入面專門調查科學解釋唔到嘅神祕案件嘅「第七行動組」。劇情講述精通術數嘅行動組總督察忠Sir(尹揚明飾),帶著方怡(蔣祖曼飾)、Joe(陳子豐飾)同埋神婆(楊偲泳飾)一齊查案,而且仲有個神神化化嘅茅山術士司馬至全(邵仲衡飾)幫手。而續集《詭探前傳》更喺今年播出,不過口碑遠遠不及《詭探》。

香港:《降魔的》(2016年)

《降魔的》被唔少網民熱捧為神劇,除咗有唔少恐怖場面之外,仲出現左唔少溫情催淚嘅劇情。劇情主要講述麻甩陰陽眼的士司機馬季(馬國明飾),接載「其他空間」的生物。一個有降魔能力嘅的士司機,隨著同行好友離世、發現親生父母力哥(金剛飾)同力嫂(小儀飾)真正死因及心儀對象芷若(黃智雯飾)入魔,令佢急速成長,誓要降魔伏妖。唔少網民對馬國明嘅表現眼前一亮,紛紛推舉佢做視帝,可惜佢大熱倒灶。續集《降魔的2.0》除咗原班人馬演出之外,劇集亦有唔少新角色加入,唔少網民都話好期待。

台灣:《魂囚西門》(2019年)

除咗港劇,當然仲有好多其他選擇啦!近近哋嘅台灣就有一套由作家九色夫嘅同名小說《魂囚西門》(「魑魅魍魎檔案」系列第一集)改編而成,仲係蕭敬騰初次主演電視劇。故事講述一名由美國返嚟嘅王牌心理師魏松言(蕭敬騰飾),本來諗住可以返台灣大展拳腳,但係情況不似預期,最後只能夠喺西門町經營「綠之門心理工作室」。不過好彩仲有個醫師女朋友洪玉玫幫手支援苦撐。點知仲要幫「鬼」做心理諮商,一面做偵探幫手搵佢地含冤嘅真相,令佢哋死得瞑目,唔好再徘徊喺人間,幫佢哋解決未了心願,比「鬼」搞到忙到昏天暗地。

台灣:《通靈少女》(2017年)

《通靈少女》其實係2013年於台灣公共電視學生劇展播出短片《神算》改編而成,以一位有陰陽眼嘅少女謝雅真(郭書瑤飾)出發嘅故事。由於有通靈能力,從小父母就將雅真送去叔叔經營嘅宮廟中修行並學習成為一名仙姑,幫助客戶化解發生向佢地身上而科學又無法解釋嘅難題。表面上平凡低調嘅16歲少女,當然都有情荳初開之時啦!因為一次偶然邂逅咗轉校生何允樂(蔡凡熙飾),由於趣味相投,所以好快就成為知己。可惜因為種種事件發生,校內不斷謠傳雅真係養鬼仔嘅妖尼姑、仲傳佢對允樂落詛咒添!最後呢段情可唔可以開花結果,其實一早已經喺第一集透露咗啦!未睇但又興趣嘅朋友,就自己搵嚟睇啦!

韓國:《德魯納酒店》(2019年)

呢套係今年暑假必看嘅韓劇,劇集正在熱播中,收視節節上升。IU喺劇中飾演嘅德魯納酒店社長張滿月,平均每一集都以10個不同造型示人。呢位外表美麗高傲,但實際上係已經超過千年被束縛嘅老女人,個性脾氣暴躁又反覆無常;佢為咗為殺害過嘅人贖罪,於是就喺首爾市中心經營靈賓專用酒店。而負責經營酒店嘅精英具燦星(呂珍九飾),因為命運被迫成為「德魯納酒店」嘅經理。唔少網民都大讚劇集除咗題材新穎及劇情充滿神秘感之外,兩位主角嘅合作亦好有火花。

韓國:《The Guest》(2018年)

劇集《The Guest》搵嚟金東旭、金材昱及鄭恩彩主演,係第一套以驅鬼為題材嘅劇集,劇情主要圍繞靈媒尹華平、驅魔司祭崔允及刑警三人身上。劇集可以話係上年韓國最血腥嘅懸疑劇集,除咗有好多殺人片段之外,仲有唔少血腥、暴力及驅魔情節。自問大膽嘅你,千祈唔好錯過喇!

日本:《東京二十三區女》(2019年)

由日本小說家長江俊和原著及親自編導嘅「東京二十三區女」一共6集,每集一個單元由倉科加奈、安達祐實、櫻庭奈奈美、壇蜜、中山美穗、以及島崎遙香等參演。劇集每集講述東京23區其中1區嘅都市傳說,從古到今反應左不同年代女性嘅悲傷故事,描寫各個女主角人生中嘅悲哀與愛恨。劇情唔太恐怖,不過奇幻詭異及鬼魅陰森,絕對值得細味。

日本:《輪到你了》(2019年)

以「殺人遊戲」形成嘅懸疑劇集《輪到你了》,講述一對新婚夫婦手塚菜奈(原田知世飾)同手塚翔太(田中圭飾),新搬入東京高級公寓,打算過平淡幸福新婚生活。點知開完個居民會後,發現鄰居們以「交換殺人」嘅方式生活。咩叫交換殺人?就係我幫你殺你怨恨嘅人,之後你又幫你殺返我怨恨嘅人囉!向呢個死者根本唔認識兇手嘅情況之下,咁警察就無咁容易比查到啦!當佢地收到一封寫有「輪到你了」嘅恐嚇信,遊戲就正式開始啦!首季嘅時候手塚菜奈遭人謀殺,所以喺第二季田中圭就誓要搵出兇手,幫老婆報仇。

泰國:《鬼娃娃》(2019年)

近年有唔少恐怖片都產自泰國,而且一直以嚟都有唔少《鬼娃娃》故事喺世界各地傳出。而恐怖劇集《鬼娃娃》可以話堪稱泰國版《安娜貝爾》,直頭係測試觀眾嘅膽量呀!故事講述小女孩緊抱洋娃娃,殊不知娃娃被鬼魂附身,而附身嘅鬼魂正正係女孩嘅母親。死後為保護女兒免被無情嘅丈夫殺害,將房間中所有嘅洋娃娃組成「鬼娃兵團」。屋企有好多公仔嘅你,唔知又有冇膽量睇呢?

印度:《惡鬼收押所》(2018年)

一講到印度片,大家一定唸起開開心心嘅歌舞片,咁大家就錯啦! 其實佢哋都有恐怖片架!就好似近年全新迷你劇集《惡鬼收押所》咁,故事改編自民間傳說阿拉伯食屍鬼,講述因為女主角Nida冷血出賣親生父親,而獲得收押所嘅拷問官一職,每日對穆斯林「恐怖份子」施虐拷打,只求維護當權者及國家秩序,之後慢慢發現有啲囚犯,唔屬於呢個世界。

圖片來源:網絡圖片