「車神」陳瀅單挑楊明 扮晒嘢

東方日報
陳瀅的鐵騎女將造型,有型有款,呃得吓人!

藝人陳瀅與楊明前日為新劇拍攝鬥電單車戲份,穿上皮褸英姿颯颯的陳瀅自言在不少劇集中要飾演鐵騎女將,但實際上她考電單車牌肥佬收場,不過,她立誓定會捲土重來。

楊明、陳瀅與衛志豪前日為無綫新劇《伙記辦大事》拍攝飛車場面,不過,楊明與陳瀅毋須親身上陣,有替身代勞。陳瀅自言曾考電單車牌,但第一關已不合格:「好多套劇都講我識揸電單車,其實我好怕兩個轆,如果係四個轆我就冇問題,好多同事都話我係車神。如果我有電單車牌,我夠膽親身上陣o架!」她表示兩年前將揸電單車的裝備交由教車師傅保存,並向對方承諾一定會再學電單車及考牌成功。

意外傷腳留陰影

至於楊明透露該場口講兩人鬥車,他笑說:「我哋只係要扮鬥車,呢個係我強項。我五年前考咗電單車牌,但幾年前拍劇揸電單車發生交通意外傷腳,自此有陰影,我當時連架電單車都送咗畀人,不過最近心癢想買番架電單車。(女友莊思明唔阻止?)唔會!因為佢最近都考緊電單車,所以佢好支持,佢想我陪佢練車。(如果拍劇要你親身揸電單車上陣?)唔係我夠唔夠膽,而係監製夠唔夠膽,佢怕我受傷,佢哋擔心過我。」他又指很久沒有揸車,技巧生疏,可能女友的技術比他還要好。

另外,衛志豪出動私伙電單車拍攝,曾拍節目《歐洲鐵騎遊》的他透露正計劃開拍第二輯。

楊明與陳瀅就係咁樣扮鬥車!
楊明心癢癢,都想買番架電單車。