【踩中女人大忌】王大陸大講年紀問題 佘詩曼嬲爆咁樣問節目組

《看我的生活》截圖

佘詩曼喺圈中紅咗咁多年,近年開始北上搵銀,事業更上一層樓,不過愛情方面就未有著落。佢啱啱就參加咗內地真人騷《看我的生活》,同台灣男星王大陸去約會,但有報道指佢畀王大陸激親仲話唔拍!

《看我的生活》節目開始就講到王大陸計劃帶阿佘去深圳主題公園,仲悉心為約會安排晒路線,仲識買定奶茶氹呢位姐姐。咁識氹女仔,難怪經常都有緋聞啦!無論如何,一開始佢哋都開開心心咁玩咗幾個機動遊戲,氣氛非常唔錯。

之後,佘詩曼王大陸經過手搖飲品店,王大陸就提議要杯奶茶,兩個人就一邊等嘢飲一邊傾計,呢個時候重點戲就嚟啦!阿佘一開始就話自己好驚玩啲太刺激嘅機動遊戲,又讚王大陸夠大膽。口沒遮攔嘅王大陸就回答話年紀越大嘅時候就會開始怕死。

今年45歲嘅阿佘即刻瞪大隻眼睥實佢問係唔係暗示緊佢,仲話自己唔鐘意人講年紀嘅問題。之後,阿佘即刻坐埋一邊同王大陸拉開距離,嚇到王大陸要即刻安撫阿佘,解釋其實佢嘅意思係有童心嘅象徵,唔係暗串佢,阿佘先同返佢坐。

之後,佘詩曼王大陸又開始講到家庭方面,阿佘就問王大陸係唔係獨子。今年29歲嘅王大陸就回答話佢有個大2歲嘅家姐,家姐已經有兩個小朋友。之後阿佘就問佢台灣係流行早婚定晚婚?王大陸就話正常,及反問:「你哋呢?」但係阿佘未開口答,王大陸就自己忍唔住衝口而出話:「晚婚!」阿佘即刻黑晒面,仲擰轉頭問節目組:「呢個人咩事呀?你搵個咩人約我出去,淨係會激嬲人!」之後仲想戴番個口罩走人。王大陸見狀就立即認錯,仲繼續氹阿佘。佘詩曼講笑咁叫佢唔使扮,半個鐘之內得罪佢兩次,去到五次就要懲罰。王大陸就問佢係唔係天蠍座,阿佘就答佢係雙子座。再傾多兩句,原來佢哋嘅生日只係差一日,佘詩曼係5月28日,而王大陸就係5月29日,即刻令到阿佘開心晒咁話大過王大陸一日。而王大陸就順勢撒嬌嗌阿佘做「小姐姐」,令到氣氛開心晒。

不過一向人緣好嘅阿佘,其實當然都係為咗節目效果先至扮嬲,希望佢都可以快啲搵番個真正嘅如意郎君啦!