《跳躍生命線》何廣沛李成昌兩父子好搶戲 網民:好睇過馬德鐘

無綫台慶劇《跳躍生命線》播咗幾集,除咗馬德鐘飾演救護員入型入格之外,其實何廣沛李成昌兩父子喺劇入面都好搶戲架,唔少網民都話佢哋兩父子嗰條綫仲好睇過馬德鐘。

喺第二集講到卓裘(李成昌飾)因為爛賭被流氓追債,仲搞到傑仔(何廣沛飾)背脊燒傷,佢深感內疚意圖斬手指戒賭,好彩俾傑仔阻止,並且日後洗心革面做人。睇完呢一幕之後,唔少人大讚李成昌勁好演技 ,雖然何廣沛做戲都唔算差,但係講對白好似怪怪地,好彩有老戲骨李成昌帶住,即刻令到觀眾入晒戲,睇到心都實埋。另外,喺呢幾集入面,佢哋兩父子相依為命,雖然經常鬥嘴同經濟環境麻麻,但佢哋兩個互相關心對方,唔少網民都覺得佢哋演得好貼地、演輕鬆時嘅表現又好親切、睇得好舒服。

李成昌連孭兩套台慶劇《跳躍生命線》及《再創世紀》,兩套都係做人爸爸,喺《再創世紀》入面,差唔多同一造型做楊怡爸爸。網民都話今年男配角應該係佢攞。