《超音鼠大電影》撤回原有造型 新版當堂順眼晒!

知錯能改,善莫大焉。半年前《超音鼠大電影》推出首波預告及海報,超音鼠嘅擬人造型,惹嚟眾多劣評,電影公司難得聽取觀眾意見,宣佈收起重作,今日再出新版預告,成個造型順眼哂!

新版電影海報
舊版海報

舊版造型長手長腳、眼比例較細同有一棚過份完美嘅牙,今次造型似返動畫版,眼大大面圓圓,身高係可愛比例同有返對手套,吸睛度即時上升。外國網友對新版表示受落,成為勵志故事meme,大致形容超音鼠可以半年內改頭換面,有志者事竟成咁話,為達成新一年新目標打下強心針!

負評版造型

《超音鼠大電影》終於從負評中逃脫,攞返唔少好評,其實電影仲有另一看點,就係占基利隔咗5年再拍喜劇!電影講述超音鼠在地球展開連場冒險經歷。他與新認識的人類戰友湯華高斯基(占士馬史頓 飾)並肩作戰,合力對付邪惡的蛋頭博士(占基利 飾),制止他企圖捕獲超音鼠及利用他的強大能量來統治世界。

改良後造型

雖然電影公司極快手執靚超音鼠個look,但片期無可避免因為重新製作而由11月延後至下年2月情人節檔期,11月本來食正美國感恩節大檔期,啱哂一家大細過節時睇,依家轉陣主打情人節檔又係咩玩法?不過,難得電影公司咁有誠意,見唔得民心即改正,勁揼本重新製作,觀眾應該唔介意情人節重拾童年回憶嘅美好!