【走過高山低谷】《金剛旅神團》大受歡迎贏口碑 金剛捲土重來重建自信

金剛同4位靚女主持(陳俞希、余逸思、練美娟及沈殷怡)拍攝旅遊節目《金剛旅神團》

2007年金剛(李信樵)憑住佢唔咸唔淡嘅廣東話,迅速打入香港綜藝市場,2010年起加入節目《超級遊戲獎門人》做「獎門人」曾志偉嘅左右手,之後仲有好多主持、拍劇及廣告機會。報導指佢當時覺得香港賺錢好容易,仲話過銀行戶口喺月頭有80萬入嚟,月中有60萬,去到月底又有80萬,個個月都係咁。

因為賺錢容易,令金剛愈來愈亂洗錢,潮牌、玩具及波鞋等等,唔睇價錢就直接買,佢又靠購物同食嘢紓緩壓力,試過同賀軍翔等四個男人喺香港一餐飯食咗成萬蚊。工作滿檔嘅金剛從來冇危機意識,直至嚟香港嘅第7年,佢嘅事業危機終於出現,報導指有傳因為曾志偉同無綫高層派系不同而遭到打壓,喺2014年金剛只有一個節目,收入就只剩無綫每個月嘅月薪。突如其來減少收入,金剛為咗慳錢經常留喺屋企打機同食杯麵,2017年完成《街坊廚神重出江湖》後,佢約滿離開無綫,帶著6個行李箱及4個大紙箱返台灣。

時隔三年,金剛捲土重來加入ViuTV,之前已經同麥長青合作拍攝旅遊節目《C9旅行團》,最近佢就同4位靚女主持(陳俞希、沈殷怡、余逸思及練美娟)拍攝旅遊節目《金剛旅神團》,去東京介紹好玩同好食嘅地方。

金剛今次喺ViuTV重新出發,《金剛旅神團》深受觀眾及網民歡迎,佢同主持們嘅互動搞笑有趣,經常擦出唔少火花,加上節目又富資訊性,節目播出以嚟都喺網上產生好大迴響,令原本冇乜自信心嘅金剛,重新建立自信,所以成日講4位靚女主持同埋女朋友Nana。

《金剛旅神團》會喺今晚播出最後一集,早前創下收視新高,成為ViuTV網站瀏覽人數最多嘅節目,今次真係吐氣揚眉啦!