【賀歲片巡禮】《緊急救援》《中國女排》 合拍片sell熱血

鼠年賀歲檔都幾熱鬧,有港產片《乜代宗師》、《我的筍盤男友》,又有賀年必見嘅黃百鳴《家有囍事2020》同王晶《肥龍過江》。今次會介紹賀歲檔唔少得嘅合拍片《緊急救援》及《中國女排》,兩套電影都同農曆年喜慶無咩關係,不過製作夠大cast又夠勁,所以中港兩地都排賀歲檔,主攻大陸票房,香港觀眾受唔受暫時係未知之數。

《緊急救援》

電影由林超賢導演,改編自內地真實救援事件,故事講述海上救援隊救援事蹟,交通海上應急反應特勤隊隊長高謙(彭于晏飾)、機長方宇凌(辛芷蕾飾)和絞車手趙呈(王彥霖飾)帶領隊伍第一時間抵達,站在水火咆哮的最前面,守在危急撤離的最後面,用生命對抗天災人禍,一次次從傾覆沉沒的鑽井平台、順流直衝的運油車頭、直墜入海的滿載客機等事故中,進行拯救。

一向擅長拍攝緊張動作場面嘅林導,出席訪問時就有提及《緊》嘅特效及場面規模,比代表香港角逐奧斯卡最佳外語片嘅《紅海行動》仲要高6至8倍。近期作品主打內地軍隊如何萬能及不屈,相信面對嚴峻環境嘅海上救援隊一樣會展現「我的字典裡沒有放棄」、「好燃」等中國最強氛圍。

《緊》主打緊張刺激,預算用喺後製比較划算,所以成個主演陣容,香港觀眾比較熟識嘅應該只有林導愛將,繼《激戰》、《破風》、《湄公河行動》後第4次合作嘅彭于晏以及陳家樂。

《中國女排》

另一套主攻內地市場嘅賀歲片,由陳可辛執導嘅《中國女排》,故事設於2016年8月22日嘅里約熱內盧。相隔1 2年,中國女排再度殺入奧運決賽。惠若琪的一記探頭球,讓全場屏住呼吸。一個高速旋轉的排球,勾連起幾代排球女將的熱血與青春。

《中國女排》除咗講述近年女排賽事,亦會講返1981年世界賽事奪標,成為金牌強隊嘅訓練辛酸,仲會回帶去返中國女排總教練朗平嘅少女年代!陳可辛導演話套戲最難係選角,首先要個型似返女排選手咁高大,要似一眾真實女排成員,仲有打得下波同有演技!最後搵嚟身高差好多,但用演技塑造出型神俱似郎平嘅鞏俐主演,而少女時代則搵咗朗平嘅親生女白浪飾演,外型似到十足十!

《中》都係賣熱血,內地版海報就分別以「中國女排,流血不流淚,掉皮不掉隊」、「願意接受任何世界強隊嘅挑戰」、「記住這些面孔,他們曾振奮一代中國人」等作為宣傳語句,運動員嘅努力的確不可抹煞,希望電影多方面反映運動員嘅辛勞而唔係一味歌頌國家美好囉。

順帶一提,白浪喺美國名校史丹福大學畢業,做過投行,今次為咗阿媽特別回流拍戲,認真孝順!咦,點解咁多內地名人後代都要出國嘅?

鼠年賀歲檔最大贏家分分鐘係陳家樂,因為佢分別有2套賀歲片《我的荀盤男友》及《緊急救援》上映,希望佢勤力有回報啦!