買米探老友記敖嘉年勁感觸

東方日報
敖嘉年、黃文慧及Kawaii探訪長者,各有相處心得。

藝人敖嘉年、Kawaii及黃文慧等昨日出席長者慈善盆菜宴,剛從另一義工活動趕到現場的敖嘉年表示,有空閒便會做義工︰「特別關心獨居長者,去年做過好多次探訪,試過買包米去探,下次去到仲見到,因為佢哋話唔捨得食!聽到都有啲心酸,好想喊,佢哋真係好珍惜,如果帶埋小朋友去佢哋仲開心!」講到跟「老友記」相處,他說:「傾偈嗰陣佢哋講咩就答咩,應咗先,佢哋好似細路仔咁。」而Kawaii認為要搵共同話題,例如一齊研究歷史。

講到工作安排,敖嘉年透露正跟馬德鐘趕拍無綫劇集《伙記辦大事》,自爆年卅晚會拍一場坐監戲:「仲會死添!(唔驚唔吉利?)冇所謂,拍戲啫!啲工作人員笑話初一就可以翻生!」稍後他將埋首籌備新一齣的舞台劇,甚具挑戰。