貪吃不等於偷食 馬國明唐僧上身念蒼生

東方日報


過氣港姐黃心穎喺的士內瘋狂攬啜有婦之夫許志安,呢齣「狂摸的」鬧劇,令人明白乜嘢叫「倒鏡影照面具蓋住或是獸與妖……(《到此一遊》)」。


就好似妖精想食唐僧肉一樣,家陣連演過唐僧坐騎嘅都唔放過。同心穎浸過溫泉嘅森美講得啱,「貪吃不等於『偷食』」,呢單嘢有第三者「義氣肥仔朋友」、街外人「的士司機」在場,學心穎話齋:「唔好扮嘢啦!X你!」係明食啦,吓話?


可憐絕種好男人馬國明被派帽後,展現出真男人風度,話「好快冇咗嬲嘅感覺」,處處維護出軌女友,更加擔心涉事嘅所有人,即係事發後唔食唔瞓唔見人、fb專頁封面轉黑嘅鄭秀文,連帶蔡一智、杜德偉、陳煒、張振朗、龔嘉欣等,不能盡錄。馬國明就算經歷完男人最痛,依然顧念蒼生,唔係唐僧係咩?


為女轉性豪食豪買


其實馬國明唔傷心就假嘅,話晒當初係黃心穎主動埋身,又「集郵」又翹手,又胸壓又話好仰慕嗰隻,成功溝掂唐僧,將絕世好仔封盤,引來全城女士葡萄。可惜吖,心穎有個筍盤都唔知足,走去搞年過半百嘅安叔,越級挑戰大廿年嘅Uncle,使唔使咁猴擒、咁進擊呀?十零分鐘返到鯉魚門啦!


枉馬國明之前為咗同女友拉近距離,放棄着咗N年嘅贊助商T恤,改着卡通Tee扮Young,據講仲花咗二十萬買潮牌添,更一改慳家性格,為氹女友豪擦五千銀日本菜。就算馬國明出咗名宅,但都強迫自己出去陪女友應酬,仲因為心穎唔Like,而改變埋婚後要同兩老同住嘅打算。點知有淚有罪有付出,還有忍耐,換嚟咁嘅回報,真係一世人流流長,總會愛上幾個交叉!


欲拒還迎狂獸起色心


或者咁講啦,呢單嘢都要多謝安叔瞓身幫手,好彩爆得早咋!馬國明先可以發揮金句王風範,以「努力工作」踏實心態自勉,畢竟戴咗帽都要生活、要食飯。之不過,若果娶埋返屋企,管唔管得住脫韁心穎都好成疑問,話晒人哋選港姐嗰陣已經傳爛蒲爛玩專攻富二代,入行後又同吳啟華、王浩信傳拍劇撻着,緋聞成本電話簿咁厚,呢個「綠簿女友」,馬國明咁好仔點食得住?


公道啲講,有人話「狂摸的」係「先撩者賤」,Nuts哥就覺得係安叔做得好錯、好丟臉,就算Sammi話原諒咗都係咁話!事關安叔冇好似《娛樂大家》「娛樂cheat chat」環節咁,將「我有老婆」、「咪鬼擒我」、「檢點啲啦」等插喺頭殼頂,遇到有人發揮中醫世家家學淵源,捉住佢隻手幫佢把脈、哄埋少少望聞問切,睇吓點醫呢個「壞咗嘅人」,佢就已經「試問堂堂男人如何能忍」。人哋用身體壓住佢,想佢冷靜啲,據佢事後講,竟然起咗色心喎。你唱《狂獸》主題曲啫,唔使做埋狂獸o架!


吸仔黑洞難以自保


「狂摸的」事件,有人探討係咪可以告侵犯他人私隱。講真,市民好想理啲癡男怨女咩,大家關心嘅係喺呢個女多男少嘅年代,有朝一日遇上呢類送到上門嘅情況,上下其手瘋狂亂摷係死,冇乜反應欲拒還迎亦死,咁究竟應該一腳伸條女落車,定unfollow對方ig,定係同司機講:「旺角差館」,點做至啱呀?你知啦,家陣科技先進到影到黑洞,包括吸仔黑洞,有#metoo、有《三夫》,但男人被性騷擾就似乎冇乜符,渣男就話抵死啫,絕世好仔咪好無辜?點先可以自保呀?


Nuts哥

 

 

是日精選

 

mc-jin細仔出世歌頌老婆

吳千語回復單身激罕晒水着

貪吃不等於偷食-馬國明唐僧上身念蒼生

吳若希老公爆囡囡公主病

黃心穎匿屋企爆喊

陳煒搶蟹執輸-街市怒喝師奶

洪卓立情傷難愈-唔知應該點做

鐵探-保養得宜靠養生-59歲惠英紅公開5大凍齡秘訣

安心出軌-傳節目飛走黃心穎-胡蓓蔚變獨唱兩首歌