負評又點?內地特技奇幻片拍極都有

之前都同大家講過下中國電影票房億億聲,塊餅分分鐘大過荷里活,為左可以超英趕美,佢地近年都有不少超級大手筆的製作,特別係以特技掛帥的奇幻片種,下下投資好多個億做CG,不過內地觀眾不一定受落。

即使係咁,呢類片仲係輪住拍輪住上。今個暑假打頭陣就有由吳磊、梁家輝、劉嘉玲、明道主演的《阿修羅》。

根據網上資料,電影團隊用左6年時間籌備、耗資1億美金同埋以荷里活大片的工作規格,搵來《狂野時速》、《魔戒》、《權力遊戲》、《末日先鋒:戰甲飛車》嘅特效團隊去拍呢個善良路人被選中拯救世界的故事。特技有幾好(定幾唔好?)就要出正片先會知,不過我反而好奇點解個造型咁似《魔戒》加《權力遊戲》,唔中唔西唔知似咩但又少少熟口熟面?

之前都有唔少用左好多億做CG但結果得啖笑嘅電影,譬如2016年郭敬明做導演的《爵迹》。郭敬明本身係小說作家,爆紅嘅《小時代》就係出自佢手筆,喺內地後生仔界別非常有影響力。之前《小》搬上大銀幕亦異常好收,一拍仲拍左4集!拍自己創作出來的時代劇好合理,但《爵迹》係魔幻類型片,仲要係真人CG拍!結果,有好多星恨拍 - 范冰冰、楊幂、郭采潔同我地唔太熟但大陸紅到癲的陳偉霆。

據聞《爵迹》仲好認真地將范冰冰的每條頭髮用3D模型做出來,剩係個頭都用左差不多12000根引導線,結果可能野心太大,套戲變左打緊Final Fantasy咁,同個個角色11頭身的比例一樣,無咩真實性可言。打鬥場面仲會卡下卡下咁(有時打機都係咁,係咪想「營造電競效果」?)。

特技未夠班之外,最大死因應該係忘記左建立故事同角色,不過啲角色叫鬼山蓮泉、 銀塵、 天束幽花咁(網名來架?),超現實都好合理。風評幾差都好,仲有第2集拍,繼續億億聲倒入海。


講開郭敬明,佢仲有另一部作品《幻城》拍成左電視劇,睇海報以為係手遊廣告。

仲有一套觀眾唔受落的內地特技奇幻片係《封神傳奇》。集結左《星球大戰》、《侏羅紀公園》、《變形金剛》、《鋼鐵奇俠》等3間荷里活特技制作公司,特效其實做得唔差但無咩新意,幾間公司都有少少交行貨的成份,合格但無做多或者新野俾你囉。套戲都幾星光熠熠,有李連杰、黃曉明、古天樂等,不過死因都唔係特技,反而係個故事同原著已經無咩關係,得返個名。CG再勁都要識講故事。


公平啲,國產特效片都唔係冇成功例子嘅。《捉妖記》、《美人魚》就係有CG又講到故事,所以票房大收的奇幻片嘞。