「負皮王」梁烈唯微博搲撈:如果大家有工作的話,請聯絡我

梁烈唯自從攞咗飛躍男藝員獎之後,本身前途一片光明,但係可惜「太多嘴」,首先喺曾志偉掌摑黃浩事件中發表「偉論」,被網民認為有擦鞋之舉;之後佢再喺北京抗日紀念大閱兵期間,加入咗微博「致敬」港星行列,令到高登仔對佢更加不滿,紛紛表示杯葛佢,更推舉佢成為高登負皮王。

人氣一落千丈嘅佢就連公司都唔敢用佢,有指當時其實無綫想用佢同金剛、王貽興一齊主持嘅清談節目《男人經》,頂替負皮多多嘅《今晚睇李》,可惜見到佢令咁多人反感而取消。

而自從成為高登 「負皮王」 之後,佢好少再有劇拍,通常都淨係做下主持、出下商場Show咁,連廣告商都唔敢起用佢。而佢同許紹雄(Benz雄) 、金剛同陳婉衡一齊主持嘅節目《男人食堂》上個月亦已經拍完最後一集,冇咩job敢埋身嘅佢唯有自己喺微博到搵Job:「各方好友兄弟:有工作的話請聯絡我!任何:酒吧show、商演、電影、劇集、網路電影和劇集、綜藝節目真人show、產品廣告代言,一律非常歡迎!感謝大家」、「各方好友:我的整個八月份都有空,但我不想停下來!所以了,如果大家有工作的話,請聯絡我,謝謝大家!」

唔少內地網民都留言表示好歡迎佢,撐去返內地發展同埋叫佢加油。

佢咁積極搵錢搲撈其實都係因為佢就嚟升呢做爸爸,更要做廿四孝老公,唔搵多啲錢點養家呢?