豬妹一夜反叛 荷里活今期最hit喜劇booksmart

呢期荷里活最熱爆、群星推介嘅電影一定係青春喜劇Booksmart!

電影以2位高中女學生為主角,有睇開美國電影都知高中畢業無會對佢地嚟講幾咁重要,仲係成年象徽。舞會當晚仲有「失豬」傳統,成為唔少父母又愛(想當年佢地咪又係咁)又恨嘅一日,不過Booksmart唔玩失豬玩反叛!故事講述1對老死,高中4年極俾心機讀書,以考入名牌大學為目標,4年過後目標達到先驚覺自己完全無玩過,成為同學心目中嘅書呆子!

因為青春只能活一次,同証明自己唔係悶蛋,2位青春少艾決定於畢業禮前癲返次,將壓抑足4年嘅瘋狂配額一夜內用哂,結果太失控搞出唔少大頭佛同爆笑時刻!

Booksmart咁受注目有幾個原因,第一係兩位女主角包括Jonah Hill細妹Beanie Feldstein,以及被Variety選為10大新星嘅Kaitlyn Deve,新人嚟講自然唔造作,喜劇節奏勁,表演亮眼。

第二個原因係套戲由《創戰紀》女星Olivia Wilde處女執導作品,選拍青春喜劇,難得唔作狀又講中少女心事!

第3就係Booksmart由全女班編劇,荷里活向來男性主導,兩性同工唔同酬,近年業界努力發聲致力改善女性待遇,Olivia Wilde親自出post希望大家多多支持,因為只要Booksmart有票房有口碑,電影公司無藉口一味拍台前幕後都以男性為主嘅電影。

Booksmart好睇好笑,爛蕃茄得到97%新鮮好評,演嘅有戲導演又做得好,仲可以幫助平權,一舉幾得!所以一眾荷里活巨星好似Natelie Portman、Mindy Kaling、Busy Phillipps以至同Booksmart打對台嘅《POKÉMON 神探Pikachu》主角Ryan Reynolds,都紛紛喺社交媒體力撐。咁多人推介,唔睇邊有話題!