譚凱琪連推兩劇 傳佗B入豪門

東方日報
譚凱琪入紙註冊不久就離奇辭演兩劇,令不少同事相信她有喜。

無綫藝人譚凱琪剛與圈外男友入紙申請註冊結婚,日前她竟離奇推辭兩套劇集,當中《BB大晒》已換人由陳自瑤頂替,「全城」直覺她秘密有喜!她受訪時指不想透露太多,只說已向公司請假幾個月。

現年38歲的譚凱琪(Zoie)剛於上月宣布婚訊,與拍拖八年的圈外富貴男友莊日宇(Enrico)入紙結婚。向來「童顏」的她樣子甜美,加上演技不俗,公司對她寵愛有加,可謂一劇接一劇。雖然被指嫁入豪門,但她受訪時曾揚言仍然年輕,婚後都會繼續於娛樂圈搏殺。

不過,據知原本已落實接拍兩套無綫劇集的Zoie,日前離奇全部辭演,其中一套《BB大晒》更已經試造型,獲安排與張頴康飾演夫婦。如今突然推拍,有幕後工作人員爆料指她以身體出現狀況為由辭演,全世界即斷定她有喜!可是同事間都只是「暗地」祝福,認為因未夠三個月而不能公開,不敢直接恭喜她。

被問勁驚訝:唔想透露太多

記者昨日聯絡Zoie,先旁敲側擊問是否要恭喜她?她起初只回答:「嘩!點解咁講呀!連我自己都唔知!」隨後再直接問是否因為有BB而要連推兩劇,她才解釋:「係我屋企突然有啲事,需要我去處理,所以同公司請咗幾個月假。公司好好,而劇組都好明白事理。(係咪未夠三個月未講得?)係家事,唔想透露太多喇!希望你明白。」至於是否都心急生BB,Zoie坦言在計劃之內:「突然之間有啲覺得似趕交功課!我會鞭策佢,同佢講大家催我哋『交功課』。」

陳自瑤頂替 怕投入唔到

至於頂替Zoie接拍新劇的陳自瑤(YoYo),坦言不知道對方辭演原因:「我都冇問咁多,係公司安排,自己會做好角色,能夠參與到呢套劇都好開心!今次我同張頴康做夫妻,大家認識多年,但真正合作就係今次,都幾大挑戰(口架)!因為大家知道同小朋友做戲要顧及嘅嘢好多,今次劇入面仲要有兩個小朋友,兩個都係男仔,佢哋都比較活潑,我都係第一次喺時裝劇做媽咪。」YoYo又坦言很熟悉張頴康為人,踢爆角色與真人有很大差異,她笑說:「平時佢好搞笑,但劇入面係好好先生,對我千依百順,對住佢我未知投唔投入到,都驚忍唔到笑。」

陳自瑤於劇中有兩個仔,坦言是大挑戰。
譚凱琪早前已試造型,依家突然推劇,仲話請長假添!
譚凱琪嫁入豪門,生幾多個都冇問題。