識煮嘢食男人特別Charm 煮廚湛錦鈿被封型男廚神

好多女士都覺得識煮嘢食嘅男人特別Charm,如果佢仲咁啱又型、又靚仔、又高、又風趣嘅話,咁就當然迷倒唔少女士,成功成為新一代男神。不過最估唔到嘅呢個男神竟然係由無綫節目《都市閒情》發掘出嚟,講緊嘅就係最新上位嘅型廚湛錦鈿Oreo!

早排八十後嘅Oreo被邀請上去《都市閒情》教整月餅嘅另類煮法,一去到就被主持宋芝齡狂讚佢高大靚仔,仲叫佢做Charm Charm,因為佢真係好Charming。

唔少人都覺得Oreo同吳卓羲有幾分相似,原來佢細個曾經喺五星酒店學廚,之後學到咁上下就出去闖世界。除咗做股票投資同外匯投資之外,亦做過模特兒,咁靚仔就當然要參加香港先生啦,不過可惜冇機會入選。不過亦係因為參與咗呢個比賽,佢多咗好多幕前演出機會。其實除咗喺《都市閒情》亮相之外,佢亦喺BigBigChannel有一個煮食節目。賺到錢之後佢就自己開咖啡店,到而家已經有2間舖頭,真係名副其實嘅港版Jamie Oliver。

Oreo接受傳媒訪問嘅時候就話《都市閒情》出街之後多咗好多男仔add佢Facebook,不過各位女士唔使擔心,因為佢話只係鍾意女仔。而佢而家主要工作就係喺鋪頭幫手,仲會開煮食班或咖啡班,各位想「面聖」嘅女士識做啦!