許廷鏗重遇前度隨時翻撻

東方日報
許廷鏗姻緣運當旺,自爆近日與多位舊愛再度聯繫。

歌手許廷鏗(Alfred)昨日在活動上,自爆幾名舊愛現身他早前的演唱會,因而恢復聯絡,自稱跟前度再見亦是朋友,不排除復合機會。

許廷鏗與曾樂彤昨日出席以器官捐贈為題的學生短片創作比賽頒獎禮,Alfred透露早前到台灣為新歌《我們與愛的距離》拍MV,坦言感到壓力:「因為隔咗一段時間冇出歌,而且好耐冇一首純講愛情嘅歌,首歌令我諗起以往幾段情。」

由朋友重新開始

他自爆早前的個唱,幾名前度也有捧場:「因為咁大家聯絡番。(向來關係友好?)OK嘅,有一個以為唔係好Friend,但原來都係OK,之前會尷尬,但聯絡番發覺以前大家都年輕!(有冇機會復合?)未諗到,但唔排除可能性。(幾個一齊復合?)咁又唔好!有啲從來都係好朋友,有啲係由好朋友開始(拍拖),我好小心,要開始一段關係我會諗得好清楚,唔會亂嚟。」此外,提到拍片,他稱除了自己的歌曲外,只要是好歌,不介意推薦其他公司的歌手作品,又指有意拍片推介美食。

曾樂彤捐器官助人

至於曾樂彤透露自己跟家人也登記了器官捐贈,希望過世後可幫到有需要的人,問到自覺哪個器官最健康?她說:「我個胃幾好,從來未試過胃痛,對眼都好,成日睇電腦同打機,但只係得百幾度近視,唔需要戴隱形眼鏡。如果我有咩事,大家可以吼住我呢啲器官。」

曾樂彤自誇雙眼的狀態最好,適合作器官捐贈。
許廷鏗早前開騷,獲多位圈中好友Sing援。