觀眾話事唔理藝術價值 People’s Choice Award影帝係Iron Man!

電影應該雅俗共賞,反正各有各口味,乙之熊掌甲之砒霜,大導演、影評可以藐爆商業娛樂片,觀眾有觀眾繼續喜愛;金球獎、奧斯卡算係業界人士小圈子選舉結果,而真正反映民意就一定要數美國嘅People’s Choice Award (PCA)!

PCA由觀眾、特別係後生仔女一人一票選出,票選獎項由音樂、電視、網路到電影都有。因為係民意所向,所以非常受到眾明星支持,已經舉行咗45屆嘅People’s Choice Award,其星光燿燿嘅程度完全不亞於奧斯卡金像獎,出席星期日典禮嘅巨星包括「鋼鐵奇俠」Robert Downey Jr、「蜘蛛女」Zendaya、笑匠Adam Sandler、《老友記》女星Jennifer Aniston、《曳曳同學會》童星Jacob Tremblay、《摩登家庭》Sarah Hyland、《怪奇物語》Noah Schnapp、《閃亮人生》Kevin Hart、歌手Pink及Gwen Stefani,名媛Kardashian姊妹等等數之不盡!

個個俾面出席除咗因為頒獎禮多人睇(收視一定高過奧斯卡),仲因為觀眾嘅支持先係最實在,有票房先有收入,受觀眾歡迎班星先有戲可以演。得獎建基於受歡迎程度,所以贏家同影評選出嘅差天共地!今年最佳電影及最佳動作電影分別由《復仇者聯盟4:終局之戰》奪得,Robert Downey Jr仲贏埋年度男演員獎。

而年度女演員則由《蜘蛛俠:決戰千里》嘅Zendaya獲得,「蜘蛛仔」Tom Holland屈居「鋼鐵奇俠」只能贏得年度動作男星獎項!迪士尼《阿拉丁》贏得年度家庭合家歡電影,喜劇類則由Netflix出品、Adam Sandler及Jennifer Aniston主演嘅《猜猜誰是兇手》奪得。

賽果其實幾反映到年青朋友嘅口味,喺香港知名度一般、美國人氣火爆、同屬後生靚仔嘅Noah Centineo同Cole Sprouse就分別憑 《最佳出租男友》及《我的5步男朋友》獲得年度喜劇男星及年度劇情片男星殊榮,2位絕對有潛力成為下個Robert Pattinson!

以上名單絕對唔會出現係任何影評人獎中,因為藝術性不足云云,就算攞唔到藝術成就獎亦無損佢地喺觀眾眼中嘅重要性,特別喺沉鬱生活中極需要娛樂慰藉心靈,心情不佳嘅時候我相信你會睇《蜘蛛俠》、《復仇者聯盟》多過睇沉重藝術片!