【親子家庭影院】 今個暑假必睇「底底超人」

講緊Dreamwork上年暑假出品,係由小朋友童書《Captain Underpants》改編成同名動畫電影《底底超人大電影》。本小朋友書喺兒童界都幾出名架,2006年仲贏左細路界大獎Disney Adventures Kids’ Choice Award,總共出咗12本兼3個外傳,淨係美國都賣左5千萬本,非常勁下!

咁到底《底底超人》講咩咁受小朋友歡迎呢?除左有屎尿屁笑話之外,故事圍繞2個小學4年級男仔George同Harold,2個小學雞創作力量同幻想都好豐富下,平時返學最鍾意搞啲小趣味整蠱下同學仔,本來得啖笑無傷大雅,但校長Mr. Krupp就唔多認同,捉左2件細路去留堂。錯有錯著,2個細路唔覺意催眠左校長,令Mr. Krupp認為自已係底褲俠有特異功能,剩係著住條底褲同披件窗簾就出去儆惡懲奸!

以為咁就完呀?故事咁簡單點會吸引到細路呀!George同Harold發現催眠成功之後簡直操控校長於股掌之間,久唔久就啪醒「底底超人」去出任務,有次遇上邪惡屎片教授(Professor Poopypants)想用超巨型屎搭強佔個鎮,佢地再次召喚底底超人大戰屎片教授,救居民出屎尿之中。

我寫到好不良咁?其實個故事教左好多愛與和平兼正義感,用來教育小朋友娛樂教育俱全!教細路唔駛下下都咁政治正確嘅,個世界都唔係非黑即白啦,係咪?不過,唔知係唔係怕投訴話教壞細路,套戲上年北美上畫,不過無喺香港、台灣、澳門戲院放映就直接出影碟。北美票房就好收得,收左差唔多8千萬美金,依家推介各位家長今個暑假買嚟播俾細路睇,順手追返原著學英文,公共圖書館同書店都好齊架,有娛樂又有得學習!