【要贏人先要贏自己】尼古拉斯基治新片本色演出 做返自己

尼古拉斯基治喺上世紀90年代至千禧年代屬於影壇天王級地位,由《驚天奪寶》到《奪面雙雄》,套套作品大收過億美金。身為大導演哥普拉姪仔嘅佢演技亦備受肯定,1995年憑《兩顆絕望的心》嘅酒鬼角色嬴得奧斯卡影帝殊榮,有票房有演技嘅佢片酬亦相當可觀,最勁時身家有1.5億美金!

不過人紅是非多,尼古拉斯基治都有唔少花邊新聞︰閃婚閃離、豪花金錢買名車算正路,佢仲鍾意買稀奇動物、落降頭用嘅人頭骨同兇宅,仲癲到喺兇宅隔離起金字塔墓!由於行為太前衛(定太離奇?),佢亦由當紅大星漸漸變成怪叔叔,自2011年《幽靈車神3D之死神復仇》後就無大片商搵佢拍戲。

不過無大片商拍商業片唔等如佢無嘢做,成為過氣沒落暗星。尼古拉斯基治轉投獨立作品懷抱,咩題材都接,密密拍無停手,差唔多年年都有3部作品面世。近期作品《狂屠絕路》(Mandy)於各大影展好評如潮,其瘋狂歇斯底里為愛妻報仇嘅演出,令佢成為Cult片之神,仲吸引咗唔少新fans。

The Awkward Moment編劇Tom Gormican因此以尼古拉斯基治為中心創作出劇本《生命中不能承受的才華》(The Unbearable Weight of Massive Talent),故事講述尼古拉斯基治用盡辦法想喺昆頓塔倫天奴新片中演出,同一時間同佢個青春期女兒關係緊張,偶爾又會精神分裂被90年代嘅自己責罵,拍太多爛片搞到星途暗淡。

為咗生計,戲中嘅尼古拉斯基治咩job都接,連墨西哥毒販生日會都照去,點知去個明星見面會,結果要做CIA卧底,負責收集毒販情報以拯救墨西哥總統個女!身為尼古拉斯基治fans嘅毒販好有心咁請埋基治老婆同女出席生日會,幫佢地一家三口修補關係!就喺條命凍過水之際,尼古拉斯基治得到一個可一不可再嘅演出機會!

睇個故事都覺得幾瘋狂,套戲仲會向多套尼古拉斯基治經典作品致敬,Tom Garmican起初擔心尼古拉斯基治唔會理佢,不過經過多番游說同保證唔會醜化佢之後,影帝竟然肯拍,多家大片商仲爭住要買個版權!據聞依家同製作《飢餓遊戲》嘅Lionsgate傾得七七八八,傾得成尼古拉斯基治有機憑《生命中不能承受的才華》重返荷里活主流市場!