被嫌唔勤力 鍾嘉欣隨時三開「復出」

香港粉絲都等你好耐喇!

藝人鍾嘉欣專程由加拿大回港兩日到尖沙咀出席活動,她說:「每次返香港都好珍惜,今次早一日返見吓朋友、團隊。本來幾個月之前計劃老公、仔女都返嚟香港住一段時間,但係依家計劃轉咗會繼續留喺溫哥華,今次返嚟都可以趁機抖吓,亦都可以衝擊思想,咁會健康啲。」

屬鼠的鍾嘉欣指新一年承諾自己和團隊會勤力點,她笑說:「結咗婚四年,生咗兩個小朋友,今年會勤力啲,都有傾緊拍劇、電影、唱歌,因為團隊覺得我唔夠勤力,自己希望今年可以步步高陞,學業進步。(減少時間陪小朋友同老公商量過?)我又冇諗住減少時間陪佢哋,老公其實一直都好支持我做嘢,佢話Happy Wife Happy Life,佢話我想做演藝嘅工作,我哋就商量諗辦法去實行。(會唔會唔捨得小朋友?)好彩依家有兩個,佢哋兩姊弟都好相親相愛,個女已經三歲都知道媽媽要工作,佢仲好期待我今次返香港會買玩具畀佢。(再放多啲時間喺工作上?)其實小朋友OK,係我自己唔捨得,唔想離開佢哋太耐,嚟緊呢幾年都會維持依家咁短短嘅時間。」