袁澧林家有驚青貓

東方日報
袁澧林暫時未有北上發展的計劃。

藝人袁澧林(Angela)昨日現身活動,親手繪製港式打卡壁畫的她謙稱沒有畫畫天分:「可能有演戲天分,我以前好鍾意睇《還珠格格》,會扮趙薇,同埋會模仿人,朋友都話幾似,真正識我嘅人都知我其實幾搞笑。」

提到有份參演的內地劇集熱播,其古裝扮相大受網民歡迎,問到會否乘勢北上發展?Angela表示會繼續留在香港,並透露有一套關於狗狗的電影即將上映,而家中養了兩隻貓咪:「不過我啲貓唔畀人掂,佢哋係街貓,朋友上我屋企都冇見過啲貓,因為佢哋以前受過驚嚇,我支持領養不棄養。」又笑說:「朋友話我啲貓有啲問題,因為驚人驚得好緊要。最近屋企換窗簾,佢哋都腳震!」

此外,講到今日是DSE放榜的日子,她說:「考得好嘅固然好啦,但考得唔好嘅,都要諗吓有啲咩學,發掘吓自己興趣。」並表示自己是最後一屆A-Level考生,當年壓力很大,最終以中等成績升讀大學。