【衝出香港】盤點近年海外出道香港明星

香港演藝界對外輸出一向只有龍虎舞獅或者武打巨星,但係近年嚟都有唔少演藝界人員出外發現,你又知唔知呢?

王嘉爾

第一位首推當然係王嘉爾(Jackson),佢並非演藝界出生,而係遺傳咗佢爸爸劍擊運動嘅細胞,12歲參加全運會攞到金牌,2011年又參加左亞洲青少年劍擊錦標賽,亞洲排名第一。後來,Jackson得到父母准許,毅然遠赴韓國成為練習生,2014年成為男團GOT7成員出道。2017年更於內地成立工作室,開拓內地市場。雖然見到佢嘅經歷豐富,但係其實佢而家只係得25歲,由香港進攻韓國再轉攻內地,亞洲天王指日可待!

冼迪琦

相比王嘉爾,冼迪琦6歲就已經喺無綫綜藝節目《殘酷一叮》亮相,之後仲拍過唔少無綫劇集。2017年佢參加咗TPE48徵選成功突圍,成為TPE 48正式成員。雖然今年初因違反團隊紀律受到處罰,但喺5月中已經復出。雖然TPE48女團喺台灣發展,但作為日本AKB 48嘅姊妹團,再進一步到日本發展亦都不足為奇!

劉曉晴

劉曉晴就係TPE48候補研究生,雖然只係研究生,但憑佢較為幼嫩嘅外貌亦都吸引到一大批fans。唔知會唔會有一日同冼迪琦拍住上,同王嘉爾一樣反攻內地呢?

莊錠欣

莊錠欣(Elkie)自細就拍過唔少無綫劇集,例如有《富貴門》、《On Call 36小時II》及《法網狙擊》等等,佢仲係薛家燕旗下少女組合Honey bees 成員。之後到韓國參加選秀成為練習生,2016年加入女子組合CLC,上年更首次推出個人單曲及參與拍攝首部韓劇《富家之子》,睇嚟經理人公司都幾睇好Elkie喎!

黃旭熙

今年先得20歲喺香港出世嘅中泰混血兒黃旭熙(Lucas),2017年被韓國三大娛樂公司「SM娛樂」相中,成為歌手練習生。參與過嘅組合有SM Rookies、NCT大型男子組合、威神V,喺今年年尾將會以全新超級男團「SuperM」成員身份出現!嘩!內地、香港、韓國同泰國都有佢嘅足跡,仲要咁鬼死靚仔,真係不得了!

黃珈熙

樣貌標緻嘅黃珈熙,同樣以近年演藝界比較蓬勃嘅韓國做起點,2017年加入韓國女子組合「本月少女」(LooNa)分隊「本月少女1/3」,上年八月正式出道。雖然現階段資歷尚淺,不過外型討好嘅黃珈熙,加上韓國演藝嘅訓練,巨星由此誕生?

張羽希

張羽希(原名張苡澂)係韓國組合forever love成員,同其他幾位唔同嘅係張羽希行較為性感路線,仲會以三點式泳衣大騷火辣身材。而畢業於北京電影學院表演系,又喺韓國演藝界浸淫,加上香港人身份,市場潛力巨大。