蜘蛛仔Tom Holland 自毀形象 由英雄變銀行劫匪

即將喺4月上映嘅Marvel《復仇者聯盟4:終局之戰》,成個系列用足十年舖陳,故事追看性十足,電影內每個角色選角都極精準,令唔少觀眾一睇愛上。以《蜘蛛俠》為例,3個男星分別擔任過蜘蛛仔,第一代Tobey Maguire最經典,第二代Andrew Garfield反應一般,最新一代Tom Holland應該最人見人愛。

由佢擔正嘅《蜘蛛俠:強勢回歸》成功幫系列回魂,票房取得好成績之餘,本身非常年輕嘅Tom拍落一班復仇者度,即刻變成可愛小弟弟;加上戲外嘅佢本身不能自控、經常網上直播劇透爆料嘅行為,變相幫Marvel做咗viral宣傳。雖然劇透打亂電影公司宣傳陣腳,不過班fans就好鍾意佢。

Tom Holland雖然常有傻氣行為,不過演戲好認真,喺《復仇者聯盟3:無限之戰》入面果句「Mr. Stark I don’t feel so good」真係睇到人心到實哂,呢場戲據聞係Tom即場爆肚演譯,可謂神來之筆!《復》導演羅素兄弟睇中Tom有人氣有潛質,新作《Cherry》決定用Tom Holland做男主角!

羅素兄弟呢幾年全情投入製作Marvel電影世界,一共導咗《美國隊長2》、《美國隊長3:英雄內戰》、《復仇者聯盟3:無限之戰》同《復仇者聯盟4:終局之戰》,隨住終章即將上映,導演羅素兄弟都要同「超級英雄」請個假,拍返普通人有血有淚有掙扎嘅故事。

《Cherry》仍在籌備階段,故事改編自Nico Walker嘅同名小說,雖然唔完全係真人真事,不過小說本身情節滲入唔少作者本身嘅經歷。故事講述一個退伍軍醫,從伊拉克戰場返到美國之後,患上嚴重嘅創傷後壓力症(PTSD)。為咗支付日益龐大嘅醫療費用而開始打劫銀行。作者Walker於2011年被捕,兼被判監禁至2020年!

Tom Holland雖然憑《蜘蛛俠》成名,但為咗唔局限形象,近年積極開展戲路,未來除咗《蜘蛛俠:決戰千里》外,排住隊上映嘅仲有同丹麥實力派男星Mads Mikkelsen大鬥演技嘅Sci-FI電影《Chaos Walking》、驚慄片《The Devil All the Time》,當然仲有上面提到、演繹有心理創傷退伍軍醫嘅《Cherry》,非常努力証明佢除咗劇透耍家外,演戲一樣拿手!