「處境劇KOL」劉丹從未遲到請病假 入行前做過呢行?

劉丹

現年76歲嘅「丹爺」劉丹,被稱為「處境劇KOL」,早前喺《萬千光輝頒獎典禮》中獲得「萬千光輝演藝人大獎」,真係實至名歸。入行52年嘅丹爺雖然飾演配角為主,不過都飾演過無數街知巷聞嘅角色,例如《神鵰俠侶》嘅洪七公、《真情》嘅「叉燒炳」李標炳、《皆大歡喜》嘅王尚、《愛·回家》嘅馬虎及《愛.回家之開心速遞》嘅「根叔」熊樹根等等,絕對係伴隨香港人成長。

丹爺大約喺6歲嘅時候,舉家由山東嚟到香港。喺木屋區長大,因為係長子嘅關係,佢要照顧體弱嘅媽媽同細佬妹,所以細細個就幫人落山擔水賺零用錢。之後,佢爸爸做警察,搬到荷里活道嘅警察宿舍,嗰陣時佢哋嘅生活環境先至有改善。

畢業之後,丹爺唔係即刻選擇加入娛樂圈,佢試過投身建築界同埋做過海員。喺行船初期,佢覺得樣樣嘢都好新鮮,不過慢慢就開始覺得悶,仲想轉行。點知一泊岸,國泰電影公司就借咗佢哋隻船拍戲,佢就對演藝呢一行產生興趣。1967年國泰訓練班招生,佢就去投考入訓練班,畢業後就成為演員。當年丹爺嘅爸爸好反對佢入行,佢要呃爸爸話已經同電影公司簽約,如果唔做要賠錢,佢爸爸先至肯答應。

直至1970年,丹爺轉投電視,先後加入麗的、佳視及無綫。丹爺入行半世紀,原來佢從來都未試過遲到同埋請病假。喺接受傳媒訪問時,丹爺話唔係得佢一個係咁,佢嘅同輩李司棋同汪明荃等等都係咁。佢仲話汪阿姐用盡精力拍劇,所以一拍完套劇,阿姐就要起碼休養2天。雖然咁樣捱法係唔正常,不過呢個就係對工作負責嘅態度。丹爺仲話自己至今都對演戲好有興趣,收到劇本會好想即刻睇,鑽研一下角色,如果知道第二日有重頭戲,佢會好興奮。

除咗做演員之外,丹爺仲試過喺2000年至2007年擔任西貢區議會嘅委任議員,喺2000年仲試過用本名「劉慶基」參加過立法會新界東選區嘅選舉,不過就未能成功當選。

劉丹