【蘇玉華無綫暫別作!】《平安谷之詭谷傳說》將接《誇世代》棒1月出街

由蘇玉華、黃浩然、陳凱琳、龔嘉欣等主演嘅劇集《平安谷之詭谷傳說》喺2017年3月已拍攝完成,直到近日終於有宣傳片出街,劇集將會緊接《誇世代》檔期播出。聽個劇名以為係鬼片,其實套劇係講民初時期,嚴重男尊女卑,女人一直被男人欺壓,一班女性點樣係困難重重嘅情況下改變思想落後封閉嘅村莊。

劇集以平安谷陸家為主軸,呂珊係劉江大太太,蘇玉華係二太太,朱晨麗係三太太,龔嘉欣係四太太。平安谷表面上好和諧, 但女人身份卻非常卑微。女人做錯事俾老公拳打腳踢、要被吊高懲罰、被眾人扔石頭,甚至老公死左老婆要陪葬等。之後更發生一系列幽靈新娘殺人事件、綁架及兇殺案等。後來由蘇玉華帶領一班受害嘅女人團結起嚟,對付欺壓佢哋嘅大男人。

一班網民都留名話要睇蘇玉華喺無綫最後一套劇,亦讚呢套劇以女人起義題材有新意,而且選角唔錯。有興趣嘅話,到時記得留意啦!