蔣家旻不排除發展羅天宇即落閘

東方日報
蔣家旻

藝人羅天宇、蔣家旻於新作飾演情侶,不過一度因表現生硬遭「彈鐘」。談到緋聞傳了多年,家旻直言「今日唔知聽日事」,不排除與羅天宇發展的可能性。

蔣家旻與羅天宇年前合作拍劇演兄妹而傳緋聞,二人卻冇有怕,近日更大方應好友麥秋成之邀,於微電影《戀戀季節》擔任男女主角「奉旨談情」,不過二人絕不享受,家旻坦言:「本來以為咁熟應該冇問題,點知即使係普通拖手、攬吓都覺得好尷尬,好彩冇咀戲咋!記得導演曾經行開過,交畀我哋自由發揮,但返嚟睇片唔收貨,話我哋太生硬!」

問到有否發展可能,羅天宇靦腆表示:「應該難啲!」反觀家旻卻相當爽直:「依家冇可能,但唔知日後會唔會再合作,可能到時擦出火花呢?呢個世界冇永遠嘅絕對!」麥秋成即「推波助瀾」笑說:「其實我拍呢個微電影想分幾部曲,仲有第二位女主角未出場,如果有贊助可能好快開續集,到時唔排除要佢哋咀嘴!」

快閃日本拍攝

由於製作費有限,麥秋成原本想到東京取景亦要轉場,更要向家旻及羅天宇「揼心口」:「佢兩個仗義幫忙,我睇中家旻識日文做埋翻譯,至於天宇仲唔話得,得3日都肯飛日本完成拍攝。」羅天宇說:「本來想留5日,點知唔得,惟有喺拍攝地點附近同長途車程時,望吓風景同影相留念。我覺得取景地鳥取係個唔錯嘅地方,不過因為拍攝超時,幾乎趕唔切上機返香港。」家旻指今次演出有壓力,拍攝前開始爆瘡,幸鏡頭遷就才保持「靚樣」。

麥秋成(左)笑言不排除安排咀戲給二人。