蔡思貝秘撻胡鴻鈞斷正!

東方日報
昨日新蒲崗
手機遮面
胡鴻鈞與蔡思貝發現記者,即驅車回電視城「避難」,女方更用手機遮樣。

「緋聞女王」蔡思貝近年努力洗底,直至最近驚爆暗撻胡鴻鈞(Hubert),秘戀中的二人10日內密會3次,女方每次都叫男友到不同地方接載,避免戀情曝光。昨日二人又再出動拍拖往男方寓所,期間被撞破好事,思貝驚青得用手機遮面,Hubert即驅車回電視城「搵碇匿」,問到是否拍拖?驚魂未定的他竟衝口而出:「係呀!」

現年28歲的蔡思貝入行至今,無論拍劇還是綜藝節目,都與合作的男星扯上關係,最近便與29歲歌手胡鴻鈞撻着!據知,二人合作雖不多,但去年拍攝無綫節目《降魔的捉妖遊戲》時開始熟落,加上近大半年Hubert被指因囂張而遭公司「雪藏」,身為好友的思貝不時陪伴安慰,熱情主動的她未幾已融化男方,「思鈞戀」至今十分低調,每次都約不同地方拍拖,避免戀情曝光。

做外賣仔餵飽女友

日前思貝獨自現身中環,戴口罩及帽笠到冚,購物後急急打電話,未幾Hubert驅車於停車場等候,思貝左顧右盼才上車,警覺性甚高。事隔數天,Hubert再做柴可夫往尖沙咀接女友,服侍周到的他還做「外賣仔」,購買魚蛋等小食餵飽思貝後才驅車離開。

熱戀中的二人於10日內密會3次,昨日又再出動拍拖!下午3時許,Hubert驅車離開將軍澳寓所,直駛新蒲崗接思貝,沿途再折返寓所時被記者撞破。戴口罩的Hubert一臉慌張,不停低頭避鏡,思貝則滿面通紅,慌亂間頻頻以手機遮面,Hubert火速驅車往電視城避追訪。抵達停車場時,二人久未下車,似商量如何解畫,未幾Hubert落車,問到是否拍拖?他初時說:「誤會咗,朋友嚟。」再問是否已一起?他又口快快說:「係呀。」但自知講錯說話即搖頭表示:「你哋諗太多,只係朋友,送朋友返工咋。(見你成日接思貝出街,頻頻見面!)順路啫,因為我哋一陣間要開工。(但你呢排冇嘢拍喎!)吓……咁我都有啲工作嘅。(同思貝有冇得發展?)大家都忙,冇時間諗呢啲。」

前言不對後語

及後思貝落車,明顯夾定口供否認拍拖:「咁啱一齊返工,佢要開會,我要攞啲嘢。(Hubert係你拍拖對象?)唔知呀,依家忙拍劇。(有冇發展機會?)呢啲唔知呀。」說罷急急腳入廠;至於自稱回電視城開工的Hubert卻驅車離開。

驚青一輪後,蔡思貝才肯露「真面目」影相。
蔡思貝急急腳入廠,迴避記者追訪。
11月26日中環
蔡思貝購物後,為避開耳目,急Call男友到停車場接載。