蔡思貝彈胡鴻鈞欠浪漫 求婚都唔嫁

東方日報
蔡思貝讚麥秋成是好男人,無奈步伐不一致分手。

藝人蔡思貝曾與排舞師麥秋成有過一段情,近日受訪時剖白雙方拍拖到分手的經過,指對方花9個月才把她追到手。昨晚她出席公司活動時,自言是超級浪漫派,問到緋聞男友胡鴻鈞是否浪漫?她即彈:「冇乜特別。」

蔡思貝、黎諾懿、馮盈盈、楊明、郭子豪、麥美恩、鄧卓殷、張秀文及黃美棋等,昨晚出席無綫《big big shop感謝祭》活動。思貝近日接受電台訪問剖白與麥秋成的一段情,指雙方做了9個月朋友才開始拍拖,其後對方想穩定照顧她,與當時剛入行的她想法不一樣,最後分手收場。

問到分手原因是否涉及求婚,思貝說:「係因了解而分開,冇求婚。(麥秋成眼中只有你?)呢個係我嘅角度睇啫!水瓶座係超級浪漫派,諗法比較離地,我嘅形容係浮誇咗少少,依家大家係好朋友,有時會問候大家。佢之前同蔣家旻條片,我都有Message佢話好睇。(有冇問佢哋係咪拍拖?)冇問佢感情事,反而事業上就有討論。」

黎諾懿學普通話呻悶

談到緋聞男友胡鴻鈞,思貝堅稱兩人是好朋友,問是否要胡鴻鈞花9個月才追到她?她笑說:「時間呢啲嘢好死嘅,唔知呀!(佢浪唔浪漫?)冇乜特別。(咁如果依家有人求婚,會唔會應承?)唔會,等我事業有啲成績先。」

至於向來普通話麻麻的黎諾懿,透露近日的起心肝與兒子一同上堂,沒料首堂已悶到瞌眼瞓:「老師教唐詩三百首,頭半個鐘已經悶到眼瞓,始終都係越級挑戰,返到屋企同太太講頂唔住,驚下星期上堂會同老師嘈交。(你啲港普有進步?)我都算係首席,暫時未有人超越到!」

張秀文騷少少Quali,已是全場最養眼!
黎諾懿與囝囝上堂學普通話,半粒鐘已瞌眼瞓。