蔡卓妍 影視齊封后

東方日報
阿Sa擸晒影后視后殊榮,果然好戲!

昨晚舉行的「2019澳門國際電影節及澳門國際電視節頒獎典禮」,英皇電影可謂大豐收,出品電影《廉政風雲 煙幕》勇奪最佳導演(麥兆輝),旗下藝人蔡卓妍(阿Sa)更創紀錄獨攬電影及電視「最佳女主角」,任達華則成為電視「最佳男配角」。

電影節評委陣容鼎盛,包括內地名導馮小剛及著名演員葛優等,能脫穎而出非易事,今屆更出現雙影后!阿Sa分別憑電影《非分熟女》及電視劇《PTU》,擸晒電影及電視「最佳女主角」殊榮,得獎後她興奮表示澳門是她的福地:「公公婆婆喺呢度生活過,感覺到佢哋喺天上守護住我,今次得獎別具意義。」內地女星柳岩則憑主演電影《受益人》同樣獲頒「最佳女主角」。

早前因患病而令粉絲擔心的阿Sa,感謝大家關注:「之前一直覺得下巴腫腫哋,以為肥咗,點知有醫生朋友幫我按吓,竟然摸到有粒嘢,建議我去照MRI,檢驗結果係淋巴囊腫,有兩粒嘢黐住口水腺位置,唔係惡性嘅,我食咗西藥療程,依家搵中醫調理免疫系統,每星期去針灸、拔罐,希望盡快康復。」

任達華奪電視男配

影帝由《老師.好》的于謙奪得,而導演麥兆輝憑執導《廉》片,與執導《中國機長》的劉偉強平分秋色,雙雙成為「最佳導演」。麥兆輝表示最想多謝老闆楊受成:「合作咗好多年,呢齣戲係我個人導演作品,所以意義非凡。」

電視組別方面,任達華憑主演內地劇《破冰行動》榮獲「最佳男配角」,他說:「最重要多謝導演,以及劇中拍檔吳剛同王勁松、扮演我個仔嘅黃景瑜。有佢哋嘅演出,先會有游走黑白兩道嘅我。」

任達華奪電視男配角獎,實至名歸。