蒙嘉慧靚湯侍候伊健唔識畀反應

東方日報
鄭伊健

鄭伊健將於明年2月24至27日及3月1日在紅館舉行《Along with Ekin Live Concert 2019》,昨日舉行記者會,獲多位好友拍片祝賀,包括台灣天王周杰倫、歌神陳奕迅及一班好兄弟陳小春、林曉峰、錢嘉樂與謝天華等。期間,大班粉絲上台祝賀,還送上DIY的相片作禮物,令他感動到有點眼濕濕。

睇足五場?驚老婆悶

最大驚喜是老婆蒙嘉慧亦有拍片祝賀,她在片中說:「知道你為咗演唱會做咗好多準備,屋企啲過期食品等完咗先食,我會繼續做老婆做嘅嘢,唔使擔心我,湯水繼續有,老公加油!」伊健大感驚訝並笑說:「嘩!連佢都出埋,都唔知畀咩反應好!我哋一直都比較低調,好少見佢出現,佢係好龐大嘅精神支柱。」

事後,伊健受訪時坦言不知老婆拍片:「但佢好似緊張過我,同平時講嘢唔同!平時牙尖嘴利,但都好開心。(飲好多愛心湯水?)都要,之前唔鍾意飲,但原來好有用。(請佢睇足五場?)唔好喇啩!佢每次都會嚟後台嘅,但驚佢悶,日日都對住我。(叫佢上台?)唔會,呢個演唱會成果唔係我一個人,係團隊嘅。」

伊健目前正在努力操練,問到會否騷肌?他說:「睇吓啲服裝點先,都要睇狀態,我就冇底線!(着短褲?)我驚好睇得滯!(你對腳唔畀得人睇?)記得有次我着短褲入廠,啲人話我好多腳毛,搞到我唔好意思,但台上真係未試過,可以諗吓嘅。」

蒙嘉慧罕有拍片打氣,但被伊健笑講得太緊張。
伊健獲大班粉絲撐場兼送心思禮物,即刻眼濕濕。