荷里活開拍K-Pop題材電影 韓國天團BTS客串演出?

K-Pop影響力傳遍全球,除咗攻入歐美市場,韓流人物仲經常於世界性票選活動勝出,可見音樂超越國界,以及一班fans有幾努力。音樂銷量成績無庸置疑,依家仲開始進軍荷里活!

根據外媒Hollywood Reporter報導,「Fat Amy」Rebel Wilson將會擔任以Kpop為題嘅新片Seoul Girls編劇及監製。故事講述美籍韓裔高中女生,夾埋幾個朋友參加全球新秀大賽,勝出者將會於全球最紅Kpop男子組合嘅演唱會做暖場表演嘉賓!幾位後生女為咗夢想,喺英國女團成員及前Kpop偶像練習生嘅幫助下,找尋屬於自己嘅舞台風采!

Rebel Wilson早早於《完美巨星幫》系列大放光芒,嚟緊又有音樂劇電影《Cats》中演出,歌喉出眾嘅佢今次唔例外都會於戲中亮相,不過戲份相對有限,將會集中精力喺幕後發功做監製。「Fat Amy」拍開喜劇,形象少少顛喪,今次染指Kpop,令一眾Kpop粉又期待又怕受傷害。

Seoul Girls開拍,消息話網上反應好壞參半。開心當然係K-Pop登上大銀幕,另一邊廂班fans又擔心K-Pop於戲中淪為東西文化差異獵奇笑料。因為有追開韓流嘅朋友都知道,要成為偶像團體成員出道,當中付出嘅心血、時間,競爭之激烈,燈光背後係一幕又一幕嘅血淚史,少啲意志都頂唔住!如果只係成為笑料就未免抹煞咗各位偶像嘅努力。

為咗更貼近K-Pop世界,Rebel Wilson就搵嚟美劇《億萬風雲》嘅韓裔編劇Young-ll Kim幫手執靚個劇本,編劇喺自己twitter上開心share話不枉自己睇K-CON多年,熱情終於有回報,仲話希望可以藉呢套電影,以後喺LA嘅Korean Town食飯有折咁話!

關於Seoul Girls,仲有單傳得風風火火嘅小道消息,就喺BTS防彈少年團會客串,喺戲中做返全球最紅男團!如果消息屬實,票房肯定有保証!