《荷里活有個大老千》下週一首播 重溫千禧年後無綫賭博劇集

由鄭則仕、秦沛、金燕玲、李施嬅、湯鎮業、張慧儀、吳業坤、王子涵、何浩文、文凱玲等人主演嘅無綫劇集《荷里活有個大老千》將緊接《大帥哥》喺下星期一首播,劇集雖然叫係《賭城群英會》嘅續集,不過會以新故事及新演員出現。劇集會以六十年代香港作為背景嘅懷舊賭博恩仇劇,其實無綫過往都有唔同種類嘅賭博劇,今日就同大家重溫一下2000年後嘅無綫賭博劇集。

《賭城群英會》(2017年)

由無綫同王晶聯合製作嘅劇集《賭城群英會》,故事講述兩代人喺賭壇上嘅恩怨情仇,不過好似唔係好啱一眾觀眾口味。劇集由好耐冇拍劇嘅四哥謝賢、叻哥陳百祥擔任男主角,而女主角就由佘詩曼及陳法蓉擔任,由一班一線藝人參與都可以話係陣容強勁,不過由於演員年紀偏大,曾被網民取笑不如改名叫《賭城耆英會》。另外,叻哥嘅「神級」演技亦令網民印象深刻,因為好多時都唔知佢想笑定喊,好似係發現自己患上末期癌症,之後開始對住塊鏡大笑及幻想同十三妹(陳法蓉飾)表白,真係睇到網民O晒嘴呀!

《乘勝狙擊》(2017年)

由陳展鵬(煎Pan)、林夏薇、陳山聰、傅嘉莉及莊思敏等人主演嘅《乘勝狙擊》主要講述賭王及一班老千爾虞我詐嘅故事。煎Pan同林夏薇飾演「爛賭情侶」,不過劇集出街後惹嚟抄襲疑雲,除咗與ATV劇集《勝者為王》主角嘅親生爸爸都係叫「天龍」及劇本有好多相似地方之外,劇中嘅千門七傑就同西片《非常盜》嘅「四騎士奇藝坊」非常相似,而陳山聰嘅魔術行騙伎倆亦同電影十分吻合。

《迎妻接福》(2007年)

眨下眼又一個豬年,12年前嘅無綫劇集《迎妻接福》由謝天華同鍾嘉欣主演。劇集講到謝天華係一個絕世「爛賭二」,賭錢賭到連自己個老婆(鍾嘉欣飾)都要輸埋,仲要將佢當咗俾黎耀祥,都真係咪話唔嬲!有網民當佢係一套劇集咁睇,亦有人覺得呢套劇係想帶出「爛賭會傾家盪產,輸埋老婆。 」呢個深層訊息。

《突圍行動》(2007年)

劇集由馬浚偉、吳卓羲、廖碧兒、楊思琦及徐子珊等人主演,以揭開賭博集團黑幕為主题,講述警察打擊非法賭場的嘅故事,裁判法院擔任法庭檢控主任嘅唐志高(馬浚偉飾),最疼錫佢嘅阿爸愛賭外圍馬,因為嬴錢嘅野心太重,令佢不借向地下錢莊借得,點知搞到一身債,更因為後悔、驚連累老婆同個仔所以決定自殺。志高因為痛恨阿爸嘅決定,所以決心做警察嘅線人。

《賭場風雲》(2006年)

劇集由歐陽震華、苗僑偉、宣萱、許紹雄、黃宗澤等人主演。睇個劇名就已經知道劇集以賭場為背景,講述齊歡暢(歐陽震華飾)自細就好有賭術天份,不過可惜年少氣盛,喺比賽前受對手喬正初(苗僑偉飾)女朋友藍小茵(郭少芸飾)誘惑,仲因為咁唔見咗自己嘅親生細佬(黃宗澤飾)。之後,齊歡暢因為呢件事好後悔,終日靠爛賭維生,人生好似冇晒意義咁。好彩最終同細佬相認,重新振作。另外,宣萱喺劇中飾演爛賭妹,經常喺賭場流連,唔少人大讚佢演得維肖維妙。歐陽震華更憑劇集獲得第35屆國際艾美獎最佳男主角提名,成为首位香港男藝人獲提名呢個國際性獎項,認真犀利呀!